Takimi historik i Kretës, Bushati e Kotzias drejt paktit për kufirin detar, çamët dhe Ligjin e Luftës
Nikos Kotzias: Diskutimet për integrimin europian të Shqipërisë
Takimi historik mes ministrave të Jashtëm, Bushati dhe Kotzias, në ishullin e Kretës, duket se do t’i hapë rrugë një takimi të nivelit të lartë në rang kryeministrash për të firmosur çështjet e dakordësuara nga ministrat e tyre.
Bisedimet që nisën të premten në ishullin e Kretës, duhej të përfundonin dje, por ato kanë marrë dhe një ditë shtesë dhe pritet të përfundojnë sot. Me ekipet e tyre teknike, Ditmir Bushati dhe ministri i Jashtëm grek Nikos Kotzias, janë mbyllur në një hotel në Kretë dhe kanë dalë prej andej vetëm për të konsumuar një drekë miqësore mes tyre. Palët po punojnë intensivisht me temat e nxehta mes dy vendeve, ndërsa në përfundim të tij, mësohet se ministri i Jashtëm grek, Kotzias, do të udhëtojë drejt Brukselit ku të hënën do të zhvillohet Këshilli i Ministrave të Jashtëm të vendeve të BE- së. “Me kolegun tim, ministrin e Jashtëm Ditmir Bushati, kemi nisur bisedimet nga mëngjesi i Së premtes. Do të vijojmë bisedimet edhe nesër( sot), para se të fluturoj për në Bruksel, ku do të zhvillohet Këshilli i Ministrave të Jashtëm të BE- së. Po diskutojmë çështje të hapura dhe duam që t’i zgjidhim sot që të ndërtojmë vizionin e së ardhmes. Po vazhdojmë diskutimet për integrimin europian të Shqipërisë”, u shpreh ministri i Jashtëm grek Kotzias.
BUSHATI
Ministri i Jashtëm shqiptar, Ditmir Bushati, në një prononcim dhënë gazetarit të “Top Channel” në Kretë, u tregua i kujdesshëm që të mos nxjerrë detaje nga arritjet e bisedimeve dyditore në ishullin jugor grek. “Ne kemi hapur një kapitull të rëndësishëm të marrëdhënieve, ku kemi tematizuar të gjitha çështjet që i konsiderojmë të hapura apo çështje që kemi këndshikime të ndryshme. Natyrisht, është bërë një punë voluminoze, sidomos dy ditët e fundit, me ngritjen e mekanizmit të nivelit të lartë ndërmjet dy palëve dhe këto dy ditë diskutime kanë qenë më konstruktive, më të strukturuara, pasi ka pasur një punë paraprake të mirë nga ekipet respektive”. Më tej, Bushati theksoi se, “E kam thënë dhe herë të tjera se kjo është një dosje jo e lehtë, rreth 70 e ca vjeçare, për pasojë, kërkon kohën e vetë dhe instrumentet më të përshtatshme për një zgjidhje mbi frymën europiane dhe bazuar në të drejtën ndërkombëtare”.
“Bëhet fjalë për një paketë dhe jemi përpjekur për t’i vendosur sipas një tematike të caktuar logjike, për sa kohë do të vazhdojmë në këtë proces konsultimi dhe në këtë proces diskutimi intensiv të imtësishëm me palën greke. Do të pëlqeja të jem i rezervuar dhe i matur në deklarime”, ka pohuar Bushati nga Kreta për “Top Channel”.