Basha tregon SMS: Zyrat e Saimir Tahirit u zbrazën, ja targat
Kryetari i opozitës, Lulzim Basha dhe deputetët e PD do të vijojnë të mbajnë në qendër të aksionit të tyre opozitar, akuzat mbi ish- ministrin, Saimir Tahiri. Basha ka publikuar në llogarinë e tij në “Facebook:, denoncimin e një përfaqësuesi të Gardës, i cili e ka informuar se zyrat e ish- ministrit Saimir Tahiri në ambientet e Gardës së Republikës janë boshatisur pas denoncimeve të PD. “RAMA- TAHIRIXHAFAJ, NË ETHE PËR TË ZHDUKUR PROVAT DHE FSHEHUR GJURMËT E KRIMIT. Zoti kryetar, një ditë pasi ju publikuat në FB denoncimin tim për praninë me orë të tëra të Saimir Tahirit dhe zonjës së tij në dy zyrat që Tahiri administron te Garda, kanë ndodhur dy ngjarje: Të mërkurën, më 8 nëntor, në ora 12 në mesditë, ka mbërritur një grup drejtuesish të Policisë dhe të Gardës, të cilët kanë kontrolluar zyrat. Të nesërmen, ditën e enjte, 9 nëntor, nga ora 9 deri në orën 12, zyrat janë boshatisur tërësisht nga bashkëpunëtorë të Saimir Tahirit, të ndihmuar nga punonjës të Policisë dhe të Gardës. Tri automjete janë ngarkuar me kuti të mëdha të mbushura plot: një furgon i bardhë me targë MB 403 AA, një kamionçinë ushtarake me targë MB 019 AA dhe një “Golf 5” ngjyrë vishnje me targë AA 258 KS. Pasi i boshatisën zyrat, i pastruan dhe ndryshuan dhe emërtimin në dyert e dy zyrave dhe u larguan”, thuhet në denoncimin e publikuar në “Facebook” nga Basha. Një javë më parë, duke iu referuar një mesazhi të dërguar nga një punonjës i Gardës, kreu i PD- së denoncoi prezencën e bashkëshortes së ish- ministrit Tahiri në ambientet e Gardës së Republikës. Zyrtarë të lartë të Ministrisë së Brendshme, përfshirë edhe ish- ministrin Tahiri, morën në përdorim zyra në ambientet e Gardës së Republikës, në kohën kur godina e Ministrisë së Brendshme nisi rikonstruksionin e saj.