Përplasje te Mjekësia mes studentëve dhe Rektoratit
Zgjedhjet për Këshillin, studentët- Ramës: Po cenohet autonomia
Zgjedhjet për Këshillin Studentor në Universitetin e Mjekësisë kanë çuar në përplasje mes rektoratit dhe një pjesë të studentëve.
Këta të fundit pretendojnë se në muajin tetor është dorëzuar për miratim rregullorja e re. Drafti i hartuar nga një grup pune me pjesëmarrjen edhe të disa pedagogëve cenon, sipas tyre, autonominë e Këshillit Studentor, pasi jo vetëm nuk është në tagrin e rektoratit që të ndryshojë kriteret e përfaqësimit në këshill, por për më tepër rregullat e vendosura dëmtojnë interesat e studentëve. “Sot jemi në një situatë kritike ku po tentohet të cenohet autonomia e Këshillit Studentor, pasi si asnjëherë më parë në historinë e Shqipërisë, në Universitetin e Mjekësisë është ngritur një grup pune ( i përbërë edhe nga pedagogë), i cili ka hartuar rregulloren e zgjedhjeve të studentëve. Këshilli Studentor është një strukturë, e cila ka varësi direkte nga Këshilli Studentor Kombëtar i Shqipërisë dhe si i tillë, hartimi ose ndryshimi i rregullores së zgjedhjeve realizohet vetëm nga ky institucion”, thuhet në reagimin e studentëve.
LETËR RAMËS
Përmes një letre me firmat e tyre, studentët i janë drejtuar Kryeministrit Rama, ministres së Arsimit, Nikolla, dhe rektorit të UM, Arben Gjata. Ata rendisin të gjitha shkeljet që vijnë nga miratimi i rreg- ullores së re, duke kërkuar që të merren masat e nevojshme që një nismë e tillë të mos zyrtarizohet.
ANKESAT
Studentët pretendojnë se rregullorja e re ndryshon modalitetet për zgjedhjen e studentëve, përfaqësues në këshill. Aktualisht në 150 studentë zgjidhet një përfaqësues, ndërsa drafti parashikon që numri i përfaqësuesve të ulet për secilin fakultet, përkatësisht në 9 për Fakultetin e Mjekësisë, 3 për Fakultetin e Mjekësisë denature dhe 6 për Fakultetin e Shkencave të Mjekësisë teknike. Përcaktimi po ashtu i zgjedhjeve një herë në dy vite është po ashtu në kundërshtim me rregulloren e re. Studentët që janë pozicionuar kundër kësaj nisme të rektoratit, e kanë cilësuar atë si dëmtim të qëllimshëm të strukturave studentore, të cilat në mënyrë zinxhir do të reflektohen në të gjitha universitetet e Shqipërisë. Ata kanë paralajmëruar më tej bojkotim të mësimit dhe protesta nëse drafti miratohet. “Këto shkelje flagrante tentojnë të cenojnë rëndë autonominë e studentëve dhe të drejtën për përfaqësim, do të fusin përçarjen mes fakulteteve, pedagogëve e studentëve dhe mund të çojnë në protesta masive dhe bojkotime të mësimit”, thuhet më tej në letrën e studentëve.