BE: Progres për negociatat, zbatoni Reformën në Drejtësi
“Mirëpresim rezultatet në luftën kundër kultivimit të kanabisit”
Bashkimi Europian vlerësoi progresin e bërë nga Shqipëria që prej progres raportit të vitit 2016, por kërkoi avancim me reformën në drejtësi dhe vetingun.
Takimi i nëntë i Këshillit të Stabilizim- Asociimit mes Shqipërisë dhe BE- së, u mbajt dje në Bruksel mes dy delegacioneve, të kryesuar nga përfaqësuesja e lartë e BE- së për Punët e Jashtme dhe Politikat e Sigurisë/ zv. presidentja e Komisionit, Federica Mogherini, ministri Bushati dhe Drejtori i Përgjithshëm për Fqinjësinë dhe Negociatat e Zgjerimit, Christian Danielsson, në emër të Komisionit Europian. Deklarata e përbashkët gjen pak mangësi në rrugën e Shqipërisë drejt hapjes së negociatave. Duke analizuar gjetjet e progres- raportit të vitit 2016, pasi për 2017- n Komisioni Europian nuk publikoi raport, evidentohen përmbushje të prioriteteve. “Këshilli i StabilizimAsociimit konstatoi se Komunikimi i vitit 2016 nga Komisioni mbi Strategjinë e Zgjerimit të BE, mbi bazën e progresit në përmbushjen e prioriteteve kyçe dhe në varësi të zbatimit të Reformës në Drejtësi dhe rivlerësimit të gjyqtarëve dhe prokurorëve ( vetting) në veçanti, rekomandoi hapjen e negociatave të aderimit me Shqipërinë. Që prej këtij momenti, Shqipëria ka bërë progres të mëtejshëm domethënës”, thuhet në deklaratën e përbashkët.
DREJTËSIA Rezultatet e Reformës në Drejtësi, e veçanërisht ato të vetingut, po priten dhe nga Brukseli si kusht për hapjen e negociatave të Shqipërisë me BE- në. “Këshilli i StabilizimAsociimit konstatoi përkushtimin në vazhdimësi të Shqipërisë për axhendën e reformave dhe nënvizoi se së bashku me prioritetet e tjera kyçe, Reforma në Drejtësi mbetet thelbësore në procesin e integrimit europian të Shqipërisë dhe mund të ketë efekt transformues edhe për reformat e tjera”, thuhet në deklaratën e përbashkët të dakordësuar dje në Bruksel. Një nga pikat që u konsiderua kusht për hapjen e negociatave me BE- në, lufta kundër kanabisit, duket se është tejkaluar, bazuar në masat e marra nga qeveria. “Bashkimi Europian mirëpriti gjithashtu hapat e mëtejshëm në luftën kundër korrupsionit dhe krimit të organizuar, veçanërisht rezultatet pozitive të arritura në luftën kundër kultivimit të kanabisit”, thuhet në deklaratë. Edhe reforma në administratën publike është pritur mirë nga Bashkimi Europian.
“Këshilli i StabilizimAsociimit konfirmoi se Shqipëria ka mbajtur një ritëm të lartë në zbatimin e masave të reformës së administratës publike dhe mirëpret në veçanti konsolidimin e masave që kanë si qëllim fuqizimin e transparencës dhe meritokracisë në shërbimin civil dhe përmirësimin e efektivitetit në kryerjen e shërbimeve pub- like”, thuhet në deklaratë. Brukseli vlerëson edhe ligjin për mbrojtjen e pakicave, një nga kriteret shtesë të vendosura nga Greqia. “Këshilli për Stabilizim- Asociim vlerësoi pozitivisht hapat e ndërmarrë në çështjet e të drejtave të njeriut, duke përfshirë miratimin e ligjit kuadër mbi mbrojtjen e pakicave kombëtare”, thuhet në deklaratën e përbashkët. Kryeministri Rama vlerësoi dje qëndrimin e Bashkimit Europian ndaj reformave të bëra nga qeveria shqiptare. Përmes një statusi në Facebook, Rama shkruan se reformat janë rrugë- time të vështira. “Reformat nuk janë shëtitje, po rrugëtime të vështira. Të bësh shtet është e lehtë ta thuash, po duhen përpjekje të jashtëzakonshme ta bësh. Por sot, kush thotë se nuk jemi në rrugën e duhur, ose nuk do të shohë, ose gabimisht e ka menduar të lehtë këtë rrugë. Kënaqësi të ndaj me ju këndvështrimin e Bashkimit Europian mbi aktualitetin e përpjekjes sonë”, shkruan Rama në Facebook, pas publikimit të deklaratës së përbashkët nga takimi i Këshillit të Stabilizim- Asociimit mes Shqipërisë dhe BE- së.