Xhafaj: Të vendosur për pastrim të plotë të grupeve kriminale
TIRANE - Ministri i Brendshëm, Fatmir Xhafaj, gjatë një konference shkencore ndërkombëtare, “Shkenca ligjore dhe sfidat bashkëkohore të sigurisë”, të zhvilluar në Akademinë e Sigurisë, foli për planin operacional të nisur ditët e fundit nga Policia e Shtetit, “Forca e Ligjit”. Xhafaj u shpreh se format e organizimit të krimit janë më të sofistikuara dhe ka nevojë jo vetëm për forcim të bashkëpunimit ndërkombëtar, por edhe për përdorim më të mirë e të gjerë të metodave bashkëkohore dhe mundësive që ofron zhvillimi i shkencës dhe teknologjisë në ditët tona. “Plani i Veprimit – Operacioni ‘ Forca e Ligjit’, i miratuar së fundmi nga qeveria shqiptare, dëshmon vullnetin politik dhe institucional të qeverisë dhe agjencive të tjera ligjzbatuese në vend, në luftën pa kompromis dhe ndëshkimin e ashpër ligjor të kriminalitetit në vend, dhe veçanërisht ndaj krimit të organizuar”, tha ministri. Vendosmërinë për të luftuar krimin e organizuar e dëshmon edhe buxheti që do t’i akordohet vitin e ardhshëm dikasterit që ai drejton. “Është buxheti më i lartë i investimeve në fushën e rendit dhe sigurisë për të paktën 10 vitet e fundit, me një rritje prej rreth 70% krahasuar me vitin që po mbyllim. Mbi 80% e kësaj rritjeje fokusohet te Policia e Shtetit dhe kryesisht do të përdoret për investime te teknologjia në fushën e hetimit dhe pajisjet shkencore, një mungesë e ndjeshme, që për vite të tëra ka ndikuar ndjeshëm në zbulueshmërinë e krimit dhe efektivitetin e procedimit penal të tyre”, u shpreh ministri. Ndërkohë pas finalizimit të operacionit në qytetin e Fierit, Xhafaj përgëzoi punonjësit e policisë, duke shprehur vendosmëri për pastrimin e grupeve kriminale. “Në Fier u realizua goditja e parë e “Forca e Ligjit”. Një grup më pak nga lista e narkotrafikut, tashmë i asgjësuar. Të vendosur për pastrim të plotë të grupeve kriminale dhe sekuestrim të aseteve të tyre”, reagoi Xhafaj pas përfundimit të operacionit.