Drogë nga Fushë- Kruja në Malin e Zi, kapen të rinjtë
Trafikimi i 70 kg kanabis do bëhej me makinë shoqëruese
Do të trafikonin kanabis për në Malin e Zi, kapet në flagrancë grupi i të rinjve nga Fushë- Kruja.
Policia ka sekuestruar një sasi prej 70 kg kanabis sativa gjatë operacionit “Ndalesa e fundit” në Malësinë e Madhe. Në pranga përfunduan dy të rinj, ndërsa tre të tjerrë ia dolën t’u arratiseshin forcave të Policisë. Lënda narkotike do të transportohej me një makinë tip “Golf V” që drejtohej nga Fatbardh Hoxha. 26- vjeçari u arrestua në momentin që kishin ndaluar në një pikë karburanti në fshatin Grizhë, në Malësi të Madhe. Bashkë me ta në makinë gjendeshin dhe Aurel Babasi, Sar Hoxha dhe Edmond Xaka, të tre nga Fushë- Kruja. Policia bën me dije se arrestimi i Hoxhës dhe Xekës u bë pasi iu gjetën një sasi prej 70 kg kanabis sativa në automjetin e tij tip “Golf 5”, me targë AA 077 RZ. Ndërsa Kledi Xeka, 29 vjeç, ishte në drejtim të mjetit “Golf 5”, me targa AA 911 RV, që po shoqëronin Hoxhën për transportimin e lëndës narkotike drejt Malit të Zi. Tre të rinjtë e shpallur në kërkim sapo kanë parë policinë, janë larguar pasi të dyja mjetet kanë qenë të parkuara në pikën e karburantit. Efektivët ngritën pika kontrolli dhe po punohet për kapjen e tyre. Dy të arrestuarit akuzohen për veprat penale të “Prodhimi dhe shitja e narkotikëve e kryer në bashkëpunim”. Burime pranë Policisë së Shkodrës bëjnë me dije se droga e sekuestruar në aksin Shkodër- Hani i Hotit kishte për qëllim që të transportohej drejt Malit të Zi. Trafikantët kishin arritur deri në fshatin Grizhë dhe më pas aty kanë bërë një ndalesë para se të kalonin pikën kufitare. Policia dyshon se do të ndërroheshin mjetet për të qenë sa më larg gjurmëve të policisë dhe droga e sekuestruar të transportohej me makina të tjera dhe jo ato që kishin shkuar deri në Grizhë. Por në momentin që kanë ndaluar pranë pikës së karburantit, janë bllokuar nga policia. Ndërsa tre të rinjtë e shpallur në kërkim, pasi kanë parë se shokët janë arrestuar, janë larguar me shpejtësi, duke u shpëtuar efektivëve. Lënda narkotike dyshohet se do të dërgohej fillimisht në Malin e Zi dhe nga aty drejt Italisë.