Panairi i Librit, protestë në 20- vjetor: Na ulni taksat
Kumbaro: Jam me ju edhe në betejën financiare për të ulur tatimet
Edicioni i 20- të i librit këtë vit u hap me një frymë proteste. Në hapësirat ndarëse mes katesh nuk ishin varur postera shtëpish botuese apo emra autorësh e librash, por parulla të tipit: “TVSH mbi librin nga 20% në 5% për të gjithë, pa përjashtim”, “Shteti të financojë bibliotekat publike”, “Tatimi mbi honoraret nga 15% në 5%”, si dhe “Mos taksoni kulturën, mos taksoni librin”, kjo e fundit një thënie e Umberto Ecos. Ashtu si për çdo vit, në sallën ovale të Pallatit të Kongreseve u zhvillua ceremonia e hapjes së Panairit të Librit. Mes organizatorëve të panairit, botuesve, shkrimtarëve, gazetarëve..., ishte e pranishme edhe ministrja e Kulturës, Mirela Kumbaro, që këtë vit është e vetmja ( institucioni që ajo drejton) që ka mbështetur financiarisht këtë institucion. Pas përshkrimit të një rrugëtimi prej dy dekadash, kreu i Shoqatës së Botuesve, Petrit Ymeri, u ndal te problematikat që shqetësojnë botuesit dhe që rëndojnë mandej te lexuesi. Një ndër ta është problemi i hershëm i taksimit. “Kemi folur vazhdimisht për përmirë- simin e sistemit të TVSH- së që është një nga pikat kryesore ku duhet ndërhyrë sa më shpejt. Kemi një TVSH 20%, në blerje, pra në shtypshkrim, i pangjarë në asnjë vend europian, ku luhatet midis 4 dhe 6%, kemi 0 % në shitje, dhe ky tatim nuk i prek të gjithë operatorët apo subjektet që botojnë. Çfarë kërkojmë: TVSH të ulët, 5%, në blerje dhe në shitje, dhe të përfshijë të gjithë ata që botojnë libra: fondacione, institute, qendra fetare apo kulturore apo çdolloj tjetër. Çdo lloj libri që shitet të ketë TVSH. Ato mund e duhet të pajisen me NIPT të veçantë për botimin. Po kështu, kërkojmë që të ndahet nga organet tatimore veprimtaria e shtypshkronjave nga ajo e shtëpisë botuese si veprimtari me NIPT më vete. Kjo gjë do të zvogëlojë edhe rrjedhjet fiskale”, tha Ymeri, i cili u ndal po ashtu te tatimi mbi të ardhurat për veprimtarinë krijuese, i cili duhet të ulet nga 15% në 5 %, pasi sipas tij, shtetit nuk i vjen ndonjë dëm, pasi bëhet fjalë për shuma të papërfillshme. Shqetësimit për taksimin iu bashkua edhe botuesi Fatmir Toçi, sipas të cilit, qysh prej 30 vjetësh problemet në lëmë të botimeve në Shqipëri janë po ato. “Kemi një sistem fiskal që nuk e stimulon botimin, nuk e stimulon krijuesin të shkruajë libra. Praktikisht, gjithë sistemi fiskal që vjen mbi librin pasqyrohet në koston e botimeve, dhe ky taksim shkon te lexuesi, ashtu si thotë Umberto Eco, shkon te leximi. Kjo është një gjë që do pak dashamirësi për ta sqaruar në strukturat përkatëse që merren me ekonominë për ta rregulluar më lehtë”, tha Toçi, që duke iu referuar gjithnjë thënies së Ecos, u shpreh se tatimi mbi krijimtarinë është një tatim mbi dëshirën për të shkruar dhe për vetë leximin. Duke dëgjuar shqetësimet e botuesve, ministrja Kumbaro u shpreh se bashkohet me zërin e tyre. “Bashkojmë radhët tona, dhe këtu jam me ju edhe në betejën financiare për të ulur tatimet. Edhe unë s’jam dakord për 15% mbi krijimtarinë. E kemi diskutuar edhe në nivel politik në komisionet parlamentare dhe brenda qeverisë. Sigurisht nuk mund të fitohen të gjitha menjëherë. Por është një argument nuk do resht së harxhuari gjithë energjitë e mia, edhe mjetet e mia qeveritare”, tha ajo.