Rama letër homologëve të BE: Hapni negociatat me ne
“Industria e kanabisit po vdes, s’jemi më kryeqyteti i hashashit”
Kryeministri Edi Rama, përmes një letre dërguar Kryeministrave të vendeve të BE- së, informon për rezultatet e reformave që qeveria e tij ka ndërmarrë.
Kreu i qeverisë ndalet në letrën e tij në dy problematikat shqetësuese të artikuluara nga vendet e BE- së ndaj Shqipërisë, kultivimi i kanabisit dhe krimi i organizuar. Rama u shpreh atyre përparimin e bërë dhe masat më të fundit për të luftuar krimin e organizuar. “Ne i kemi çuar përgjegjësitë një hap më tej. Ditët e fundit, qeveria ime ka aprovuar plane ambicioze për të luftuar krimin e organizuar. Ne kemi paralajmëruar liderët e bandave kudo që ata mund të fshihen, ne do t’i gjejmë, do t’i arrestojmë dhe do t’i padisim, duke i besuar sistemit tonë të reformuar rishtazi të drejtësisë, për t’i dërguar këta të akuzuar në burg. Dhe ne do të konfiskojmë pasuritë e tyre të paligjshme. Kulturës kriminale që shqiptarët e kanë duruar për vite të tëra, po i vjen fundi. Ne jemi në proces të ndërtimit të një infrastrukture kombëtare për sundimin e ligjit, të ngritur specifikisht për ta çrrënjosur këtë plagë dhe për të parandaluar infektimin e gjeneratave të ardhshme”, thotë Rama në letrën e tij. Në lidhje me kultivimin e kanabisit, Kryeministri Rama shprehet në letër, se kësaj industrie i ka ardhur fundi. “Shqipëria nuk është më kryeqyteti europian i kanabisit, ashtu siç disa media kanë dëshirë ta quajnë. Industria e kanabisit po vdes. Ne synojmë që ta ndalojmë plotësisht, njëherë e mirë, deri në fund të këtij viti”, thotë Rama. Me këtë progres të bërë nga qeveria shqiptare, Kryeministri shpreson që vitin e ardhshëm Shqipëria të çelë negociatat e anëtarësimit me BE- në dhe për këtë kërkon mbështetjen e homologëve europianë. OPINIONI Në një opinion të botuar në gazetën “Financial Times”, Kryeministri Rama, tregon ndryshimin e madh që është bërë në Shqipëri sa i takon kultivimit të kanabisit. “Javën e kaluar mësuam që aksioni ynë po korr fryte. I detyrohemi Policisë Financiare italiane, Guardia di Finanza, dhe mbikëqyrjes së sofistikuar që kryen ajo nga ajri për të zbuluar parcelat me kanabis për forcat policore shqiptare. Statistikat nuk lënë vend për dyshim. Një vit më parë, në fluturimet e tyre ata identifikuan 2086 sipërfaqe të mbjella anembanë Shqipërisë. Këtë vit, edhe pas fluturimeve të zgjatura e monitorimit të shtuar, numri i tyre ishte vetëm 88. Tashmë, të gjitha ato janë shkatërruar nga Policia jonë. Ky është përparim real. I etiketuar për vite si kryeqyteti europian i kanabisit, Shqipërisë iu mbush kupa dhe ne nisëm të reagojmë”, shkruan Rama. Kreu i qeverisë shprehet se problem për sigurinë, jo vetëm kombëtare, janë trafi- kantët e drogës që jetojnë dhe në vendet e BE- së. “Megjithatë, këta kriminelë nuk veprojnë vetëm në Shqipëri. Ata janë të lidhur e të ndërlidhur me krimin e organizuar në vendet e konsumit të kanabisit dhe qeveritë e këtyre vendeve duhet, po ashtu, të mbajnë pjesë të përgjegjësisë për t’i çuar ata përpara drejtësisë. Ne, në Shqipëri, kemi bërë gjithë ç’kemi mundur për të çrrënjosur një burim të konsiderueshëm të një problemi mbareuropian, por vendet e konsumit duhet të hetojnë me të gjitha energjitë kriminelët dhe të ngrijnë të ardhurat që vijnë nga krimet e tyre. Në javët e muajt në vijim, ne do të ndajmë ato që dimë dhe provat që kemi kundër tyre me forcat policore e rregullatorët financiarë në të gjithë Europën. Ata janë njerëz të rrezikshëm”, shkruan Rama në opinionin e tij në gazetën “Financial Times”.