Tenderat 720 milionë lekë për rikonstruksion, shkolla e Shupenzës ende e mbyllur
Fondi i Zhvillimit të Rajoneve financoi investimin. Bashkia skualifikoi gjashtë kompani që konkurruan për tenderin
Monitorimi i nivelit të gazit në klasat e shkollës “Rifat Manjani” në Shupenzë të Bulqizës, shtyn mësimin për tri ditë të tjera.
Aparaturat e matjes u vendosën nga specialistët e Institutit të Shëndetit Publik, por rezulton se ajri është ende i ndotur nga gazi i çliruar, çka ka lënë sërish pezull mësimin në këtë shkollë të rikonstruktuar vetëm disa muaj më parë. Ndonëse një investim prej rreth 720 milionë lekë të vjetra për rikonstruksionin e saj ( nga të cilat një pjesë edhe për “ndërtim shtesë dhe rikonstruksion i shkollës 9- vjecare Shupenze”, kanë nisur problematikat e para. Sipas të dhënave të publikuara nga Open Procurement Albania, institucioni prokurues është Bashkia e Bulqizës dhe objekt tenderi është “Rikonstruksion i Shkollave të Njësisë Administrative Shupenze”, financuar nga Fondi i Zhvillimit të Rajoneve. Nga të dhënat e publikuara, rezulton se kanë konkurruar shtatë operatorët: Anifete Muca, Mara 2011 sh. p. k, Boshnjaku SHPK, Junik SHPK, Alko Impex General Construction SHPK, Ndregjoni SHPK dhe Alb Lea Internacional sh. p. k. Në fund, autoriteti ekonomik kontraktues është shpallur Ndregjoni sh. p. k, me kontratë të lidhur më datë 14.09.2016 dhe kohëzgjatje kontrate 6 muaj. Rezulton se ka pasur ankesë vetëm nga një prej operatorëve konkurrues, konkretisht Boshnjaku sh. p. k. Ndërkohë, në formularin e njoftimit të fituesit nga ana e Bashkisë së Bulqizës, e publikuar po nga Open Procurement Albania, ofertuesit e tjerë janë skualifikuar për motive të tilla si: nuk disponojnë kamion vetëshkarkues me peshëmbajtje mbi 35 tonë, nuk kanë paraqitur kontratë furnizimi për materialet duralumin, nuk ka ekskavatorë me zinxhir, nuk ka ekskavatorë me goma në numrin e kërkuar, nuk ka motosaldatrice në numrin e kërkuar, nuk ka paraqitur cer- tifikatë fitosanitare për furnizimin me pemë. Madje, një nga motivet e një operatori të skualifikuar ishte se, “nuk ka paraqitur CV, diplomë për inxhinierët”.
Pavarësisht investimit të kryer, firma që ka zbatuar punimet e shkollës së mesme të Shupenzës kishte bllokuar oxhakun e shkollës me materialet e saj, çka solli si pasojë asfiksinë e rreth 80 nxënësve dhe mësuesve. Një nxënëse 17 vjeçe dhe një mësues u sollën me urgjencë në Tiranë me helikopterë pasi gjendja e tyre ka qenë mjaft e rëndë. Nxënësit i pohuan Policisë se tymi kishte nisur të pushtonte shkollën që në mëngjes kur sistemi i ngrohjes me pelet ishte ndezur për herë të parë. Oxhaku i bllokuar nga firma me tulla e punime e ka kthyer mbrapsht tymin dhe për pasojë është shpërndarë në të gjithë shkollën. Nxënësit kanë pohuar se kanë kërkuar që në fillim të dilnin jashtë pasi kishin dhimbje koke. Por mësuesit i kanë mbajtur ata për rreth dy orë në atë situatë, derisa gjendja e tyre është përkeqësuar me simptoma të rënda që nga dhimbjet e kokës, marrje mendsh, vështirësi në frymëmarrje e deri të vjella. Burime nga shkolla ku ndodhi ngjarja bënë të ditur se mësimi pritet të nisë ditën e enjte, pasi specialistët të matin edhe një herë nivelin e ndotjes dhe të japin konfirmimin se nuk ka gazra që rrezikojnë shëndetin e nxënësve.