Shkarkimi i Zgurit e Llallës, Rama thërret deputetët e Komisionit të Ligjeve
Kryeministri Rama ka pritur në zyrën e tij deputetët socialistë të Komisionit të Ligjeve. Ky takim është pjesë e komunikimit të drejtpërdrejtë të Kryeministrit me deputetët e tij, sipas Komisioneve Parlamentare. Pak ditë më parë, ai priti deputetët e Komisionit të Ekonomisë. Mësohet se takimi nuk ka pasur një tematikë të përcaktuar, por deputetët kanë ndarë me Kryeministrin axhendën e punës së këtij komisioni. Ata kanë informuar Kryeministrin se kërkesa e Grupit Parlamentar Socialist për shkarkimin e kryetarit të KQZ- së, Klement Zguri, ka mbërritur në këtë komision dhe se do të jetë mbledhja e kryetarëve e ditës së enjte, e cila do ta përfshijë atë në rendin e ditës së punimeve të Kuvendit, duke e kaluar atë për diskutim në Komisionin e Ligjeve. Burime nga takimi thanë për “Panorama”, se letra e ekspertëve të EURA- LIUS dhe OPDAT, pritet të jetë objekt diskutimi në këtë komision. Juristë të Grupit Parlamentar Socialist thanë dje se çështja e Prokurorit të Përgjithshëm, sipas Kushtetutës së re, pritet të zgjidhet menjëherë pas ngritjes së Këshillit të Lartë të Prokurorisë dhe Këshillit të Lartë të Gjyqësorit. Këto dy institucione nuk kanë nisur ende nga puna për shkak të mungesës së anëtarit, që duhet të vijë nga shoqëria civile. Pritet që në ditët në vijim, edhe ky vakum të plotësohet, dhe dy institucionet e reja të drejtësisë të nisin nga puna duke hapur procedurën e Prokurorit të ri të Përgjithshëm, kompetencat e të cilit janë më të pakta se ato të prokurorit aktual.