Inspektorit të Policisë në Babicë i shkrumbojnë “Benzin”
Dyshohet e qëllimshme për shkak të detyrës në zonën e drogës
Mjeti tip “MercedesBenz” në pronësi të Zini Zenelajt është përfshirë në flakë rreth orës 03: 10 të së martës, ndërsa ngjarja dyshohet të ketë qenë e qëllimshme për shkak të detyrës që kryen inspektori në Babicë, zonë e përfolur së fundmi për tonelatat e drogës të sekuestruara në pronësi të Habilajve. Sipas të dhënave të Policisë, mjeti ka qenë i parkuar pranë banesës së inspektorit, në lagjen “Pavarësia”, shumë afër zonës së Skelës. Flakët kanë rrezikuar edhe mjete të tjera të parkuara afër, por madje edhe një banesë që ndodhej aty ngjitur. Inspektori e familjarë të tij të alarmuar për ngjarjen kanë lajmëruar policinë dhe zjarrfikësen, të cilët mbërritën në vendngjarje duke bërë të mundur edhe shuarjen e flakëve. Nga grupi hetimor është konfirmuar se zjarrvënia ka qenë e qëllimshme, për shkak se në pjesën e përparme të automjetit është gjetur një sasi lënde djegëse, çka ka shkaktuar edhe shkrumbimin e makinës. Policia bëri të ditur se ka nisur hetimet për ngjarjen dhe se paraprakisht dyshimet e para lidhen me detyrën që kryen Zenelaj si inspektor policie. I pranishëm dje në vendin ku ndodhi ngjarja, inspektori Zenelaj mohoi të ketë konflikte me persona të tjerë. “Nuk e di kush mund ta ketë bërë, nuk kam se çfarë të deklaroj, pres hetimet e policisë. Nuk kam ndonjë konflikt me ndonjë person. Mendoj se ndoshta ngjarja mund të jetë shkaktuar nga ndokush që ka tentuar grabitjen e automjetit dhe në kohën kur nuk e kanë arritur, i ka vënë flakën. Është Policia ajo që do të japë detaje të tjera rreth gjithçkaje çfarë ka ndodhur”, u shpreh inspektori Zenelaj. Në vendin ku ka ndodhur ngjarja mungojnë kamerat, çka e ka vështirësuar hetimin e Policisë. Burime nga grupi i hetimit bënë të ditur se Zenelaj punonte prej një viti si inspektor Policie në zonën e Babicës dhe Alikokës. Për këtë shkak, nuk përjashtohet pista e një hakmarrjeje të mundshme ndaj tij nga persona të lidhur me drogën. Blutë nuk dhanë detaje të tjera nëse janë të dyshuar Habilajt në këtë ngjarje, pasi një sasi prej rreth 4 tonësh drogë në pronësi të tyre u kap në vilën e mikut të tyre ( infermierit Armando Koçer- ri) në fshatin Babicë. Asokohe, Zini Zenelaj ka qenë inspektor në Alikokë, shumë afër Babicës. Më parë ai ka kryer detyrën e inspektorit të rendit në Drejtorinë e Policisë së qarkut Vlorë. Sipas të dhënave nga hetimi, konfirmohet se ka qenë lënda djegëse ( benzinë) e hedhur në pjesën e përparme të automjetit që ka shkaktuar zjarrin. Tashmë “Benzi” ka dalë totalisht nga përdorimi, pasi i është dëmtuar motori. Automjeti është djegur në afërsi të zonës ku më datë 10 shtator të këtij viti u përfshi nga flakët sërish nga një zjarrvënie e qëllimshme makina i një tjetër inspektori të Policisë, Dhimtraq Nuraj. Banorët e Vlorës janë në panik pas ngjarjeve të njëpasnjëshme të djegieve të automjeteve. Këto ngjarje dyshohen të jenë të qëllimshme, ndonëse në disa raste Policia i ka konfirmuar si ngjarje aksidentale për shkak të shkëndijave elektrike.
I djegin gjatë natës makinën inspektorit të Policisë së Babicës.