Fuga: Ta kthejmë Akademinë në një forum shkencëtarësh

Akademiku Artan Fuga, një nga zërat kryesorë që kanë kërkuar reformimin e Akademisë së Shkencave në takimin e zhvilluar me Kryeministrin Rama, ka sugjeruar që Akademia të ndryshojë sipas parimit “Reformim nëpërmjet rithemelimit”. Fuga deklaroi se ka punuar për këtë reformim duke marrë parasysh edhe fyerjet që kanë ardhur në drejtim të tij nga disa kolegë. “Për reformën e Akademisë së Shkencave deri tani është konceptuar siç thanë edhe kolegët dhe aprovuar unanimisht propozimi për një pozicionim të ri të saj. Jo më si institut kërkimi shkencor, por si forum shkencëtarësh akademikë që kontribuojnë për strategjinë e kërkimit shkencor në partneritet me qeverinë. Edhe unë, bashkë me kolegë të tjerë, kam punuar për këtë ide, jam shprehur dakord për të, e cila pas vitesh rezistencë është pranuar tani. Edhe nga ata që deri dje e kanë kritikuar dhe e kanë quajtur të pamundur. Edhe personalisht më kanë fyer kur kanë mundur, në gazeta, intervista, televizione. Disa inatçinj vazhdojnë edhe sot të fyejnë. Por nuk ka rëndësi deformimi, rëndësi ka reformimi”, ka deklaruar Fuga. Akademiku i ka propozuar kreut të qeverisë parimin që duhet ndjekur sipas tij për reformimin e Akademisë së Shkencave, duke mos ndërprerë fondet e parashikuara në buxhet. “1- Akademisë së Shkencave t’i alokohen fondet që planifikohen edhe në dokumentin e Ministrisë së Financave, ama kundrejt angazhimit të saj solemn për reformim brenda vitit 2018. Në mënyrë që duke marrë fondet e funksionimit sipas parashikimeve ligjore në fuqi, ajo të ketë mundësinë e reformimit. 2Akademia e Shkencave dhe qeveria shqiptare unë do të propozoj të nënshkruajnë një marrëveshje vullneti të përbashkët, të mirëkuptimit, të bazuar në një projekt strategjik reforme të aprovuar nga të dyja palët qysh në fillim të procesit. 3- Propozoj të ngrihet një komision qeveritar besimi reformimi në bashkëpunim me akademinë, që në fund të procesit të vlerësojë performancën e reformimit sipas strategjisë të rënë që në fillim dakord. 4Pas procesit të reformimit, mbi bazën e një statuti të ri të rinovohet Asambleja e Akademisë së Shkencave sipas prurjeve të reja, në vendet vakante që do të krijohen sipas pritshmërive të reja, të punës së akademikëve, sepse unë nuk kuptoj që një akademik të jetë akademik, nëse ai nuk është aktiv në një grup kërkimi apo në një grup universitar që kontribuon brenda dhe jashtë vendit dhe pastaj, pas prurjeve të reja dhe rinovimit të asamblesë, të bëhen zgjedhjet. Me këtë akt, Akademia e Shkencave të konsiderohet e reformuar”, propozoi akademiku Fuga.