PD nxjerr dokumentet: Paratë në makinën e Sotës, jo për “Kurum”
Alibeaj: Tahiri nuk ishte në Gjermani për babanë e sëmurë, dyshojmë se fshehu provat
Deklarimet e Orest Sotës, personit të arrestuar në Elbasan me 863 mijë euro në makinë dhe dy patenta të ish- ministrit Saimir Tahiri, janë të pavërteta dhe po pengojnë drejtësinë.
Kjo ka qenë deklarata që nënkryetari i Grupit Parlamentar të PD- së, Enkelejd Alibeaj, ka publikuar në media, duke nxjerrë edhe vendimin gjyqësor që ndalonte “Kurum”- in, kompaninë në të cilën Sota pretendon se do të depozitonte paratë, që të pranojë shuma mbi 2 milionë lekë. Dokumenti i Gjykatës së Shkallës së Parë Tiranë vendos se administratori i “Kurum”- it, Jusuf Sezai, e kishte të ndaluar çdo transaksion cash apo nëpërmjet bankës për shkak të procedurave të falimentit të kompanisë. “Publikimin e kufizimeve të administratorit ekzistues, Jusuf Sezai Kurum, për transaksionet mbi 20 000 000 ( njëzet milionë) lekë, e cila do të vazhdojë përgjatë gjithë periudhës së planit të riorganizimit të shoqërisë”, thuhet në vendimin e marrë nga shoqëria tregtare “Kurum”. Ndaj dhe sipas demokratëve, versioni i deklaruar nga Orest Sota se me shumën prej 863 mijë eurosh që iu gjetën në makinë do të blinte hekur, është i rremë. “Versioni i tij, se me 863 mijë euro do të blinte hekur te ‘ Kurum’, është një mashtrim për të mos treguar se paratë, ashtu si patentat, i përkasin Saimir Tahirit”, deklaroi Alibeaj. Për të treguar se kompania “Kurum” nuk pranonte transaksione mbi 20 milionë lekë, PD ka publikuar edhe një tjetër dokument të QKB- së që e bën të pavlefshëm çdo pranim shume mbi këtë vlerë. Sipas dokumentit të depozituar më 3 gusht 2017 në Qendrën Kombëtare të Biznesit, çdo transaksion mbi 20 milionë lekë i administratorit Jusuf Kurum do të ishte i pavlefshëm, pra Orest Sota e kishte të pamundur të bënte biznes me “Kurum”, me shifrën e 863 mijë eurove, pak më shumë se 1 milion dollarë.
UDHËTIMI
Partia Demokratike ka akuzuar Tahirin edhe në lidhje me udhëtimin e bërë jashtë vendit pak ditë më parë. Sipas PD- së, faktet e publikuara në media provojnë se versioni i hedhur prej Tahirit, se po i qëndronte afër të atit për arsye shëndetësore, nuk qëndron. “Në media janë bërë publike faksimilesh të sistemit TIMS ku rezulton se babai i ish- ministrit të Brendshëm Saimir Tahiri ka hyrë dhe ka dalë nga Shqipëria, përpara largimit të Saimir Tahirit në Gjermani”. Demokratët kanë ngritur dyshime se udhëtimi i Tahirit ka për qëllim fshehjen e provave që e akuzojnë për trafik ndërkombëtar narkotikësh.
PROKURORI
Sipas opozitës, Kryeministri Rama po pengon drejtësinë për rastin e ish- ministrit të Brendshëm Saimir Tahiri dhe kryebashkiakun e Durrësit, Vangjush Dako. PD akuzon kreun e qeverisë se po përpiqet të fitojë sa më shumë kohë, deri sa ta kapë plotësisht Prokurorinë. “Heshtja e Kryeministrit të vendit, për përfshirje në krimin e rëndë të trafikut ndërkombëtar të narkotikëve dhe blerjes së votës në shkëmbim të tenderave të dy bashkëpunëtorëve të tij, Tahiri dhe Dako, ka një qëllim: të fitojë sa më shumë kohë deri sa ta kapë plotësisht Prokurorinë. Edi Rama po u jep atyre mbrojtje politike nga drejtësia, sepse, gjithçka dhe të gjithë, lidhen me Edi Ramën. Marrja nën kontroll e Prokurorisë dhe sistemit të drejtësisë i bën Saimir Tahirin dhe Vangjush Dakon të paprekshëm dhe atëherë nuk do të ketë asnjë peshk të madh në rrjetën e drejtësisë”, ka deklaruar, Alibeaj.