Ambasadori i SHBA në OSBE: Tahiri, i implikuar
“Ish- ministri i Brendshëm ka mbështetur trafikantët e drogës”
Përfaqësuesi i Shteteve të Bashkuara të Amerikës në OSBE, Harry Kamian, deklaroi në Vjenë se një ish- ministër i Brendshëm i qeverisë shqiptare është i implikuar në Itali për mbështetjen e trafikantëve të drogës. Kamian, i cili është përfaqësuesi politik i SHBA- ve pranë OSBE- së, ndryshe nga çdo diplomat tjetër, foli qartë për implikim të Saimir Tahirit me trafikantët e narkotikëve. Këtë qëndrim i ngarkuari me punë i SHBA- ve në Këshillin e Përhershëm të OSBE- së në Vjenë e bëri përmes një letre pas raportit vjetor të mbajtur në Vjenë të ambasadorit të OSBE- së në Tiranë, Boschard. “Korrupsioni dhe kriminaliteti në të vërtetë mbeten pengesa për prosperitet në Shqipëri. Prokurori i Prokurorisë së Tiranës po heton aktualisht më shumë se 3,000 raste të marrjes në punë dhe shkarkimit të përkrahësve partiakë gjatë periudhës së fushatës zgjedhore 2017, një shqetësim që është ngritur edhe nga ODIHR. Në njërin nga rastet, një ish- ministër i Brendshëm, i cili tani është anëtar i Parlamentit, është implikuar në Itali për mbështetjen e trafikantëve të drogës. Z. Ambasador, duke iu drejtuar këtyre dhe problemeve të tjera, koordinimi midis aktorëve ndërkombëtarë do të vazhdojë të jetë një nga çelësat e suksesit”, është shprehur ambasadori i SHBA- ve. Ambasadori Kamian në emër të SHBA- ve ka falënderuar ambasadorin e OSBE- së në Tiranë për punën e madhe dhe për qasjen bashkëpunuese të misionit për të ndihmuar Shqipërinë të ecë përpara në rrugën e saj demokratike dhe euroatlantike. Sipas ambasadorit amerikan në Vjenë, Harry Kamian, referuar këtyre çështjeve dhe problemeve të tjera, koordinimi midis aktorëve ndërkombëtarë do të vazhdojë të jetë një nga çelësat e suksesit”.
Teksa vlerëson raportin e OSBE- së për zgjedhjet në Shqipëri, ambasadori amerikan pranë zyrave qendrore të OSBE- së në kryeqytetin austriak thekson se SHBA- të mbështesin takimin e parë të komisionit ad hoc për Reformën Zgjedhore në Shqipëri.
“Rrjedhimisht, Shtetet e Bashkuara përshëndesin takimin e parë të komitetit ad hoc të Reformës Zgjedhore të Shqipërisë më 10 nëntor. Z. Ambasador, unë e mirëpres përkushtimin tuaj që ju paraqitni në deklaratën tuaj për të punuar ngushtë me ODIHR- in. Ne inkurajojmë komitetin që të ndërmarrë hapa realë - në koordinim me Prezencën e OSBE- së në Shqipëri - për të zbatuar rekomandimet e ODIHR- it dhe të Komisionit të Venecias”, tha i ngarkuari me punë i SHBA- ve në Këshillin e Përhershëm të OSBE- së në Vjenë.