Shqipëri- Serbi, 100 kompani takim për të ardhmen ekonomike
Ferra: Eliminojmë barrierat. Qato: Avokate e sipërmarrjes
Mbi 100 kompani shqiptare dhe serbe morën pjesë në mbledhjen e parë të Dhomave të Tregtisë Shqipëri- Serbi, ku u diskutua për forcimin e bashkëpunimit mes dy vendeve në fushën e tregtisë dhe ekonomisë.
Mbledhja u hap nga presidenti i Dhomës së Tregtisë dhe Industrisë Shqipëri- Serbi, Isuf Ferra, i cili premtoi se dhoma që drejton do të krijojë të gjitha lehtësirat për të nxitur shkëmbimet tregtare mes kompanive të dy vendeve dhe do veprojë si urë lidhëse për rritjen e investimeve dypalëshe. "Akoma mbetet shumë për t'u bërë lidhur me përmirësimin e eficiencës së shkëmbimeve tregtare midis dy vendeve. Konkretisht, në eliminimin e pritjeve në pikat kufitare, të cilat mbartin kosto të larta për biznesin. Nisur nga ky fakt, po punojmë dhe do të angazhohemi më fort në organet sh- tetërore, për të lehtësuar procedurat, duke bërë që të ndërmjetësojmë minimizimin e këtyre kostove. Një tjetër ngërç është dhe mosshfrytëzimi siç duhet i portit të Durrësit. Në do të punojmë më tej që ky port i Adriatikut, i kombinuar edhe me korridorin efikas të transportit, Rrugën e Kombit dhe hekurudhën, të shndërrohet në një portë hyrëse dhe dalëse shumë e vlefshme për dy vendet tona", tha Ferra në fjalën e tij.
MINISTRJA QATO
Mbrojtja e interesave të sipërmarrëse të huaj dhe vendas u garantua edhe nga Ministrja e Shtetit për Mbrojtjen e Sipërmarrjes, Sonila Qato. "Tregtia dypalëshe ka pasur zhvillim të qëndrueshëm duke arritur në 118. 6 milionë euro në periudhën janar- shtator 2017. Një rritje domethënëse krahasuar me të njëjtën periudhë të një viti më parë. Zyra të cilën përfaqësoj, do të bëjë të gjitha përpjekjet e nevojshme për plotësimin e detyrës si një avokate e sipërmarrjes vendase dhe të huaj në vendin tonë për garantimin e mbarëvajtjes së dy realiteteve ekonomike, të cilat tashmë vijnë kaq afër njëritjetrit. Ndaj ju ftoj të trokisni sa herë të jetë e nevojshme për kërkesa, sugjerime, diskutime apo çfarëdolloj tematike që ju e shikoni të nevojshme e për të rritur këtë bashkëpunim reciprok midis sipërmarrjeve të dy vendeve tona", theksoi Qato.
TAKIMI
Në këtë takim të rëndësishëm ishte i pranishëm ministri serb i Ekonomisë, Goran Knezevice, si dhe biznesmenë serbë e shqiptarë, mes tyre edhe presidenti i "Hysenbelliu Group", Irfan Hysenbelliu.
Për ministrin serb të Ekonomisë, Goran Knezevic, e ardhmja e dy vendeve tona është Bashkimi Europian, ndaj ai kërkoi që Shqipëria dhe Serbia t'i zgjidhin sfidat politikeekonomike me dialog në funksion të së ardhmes së përbashkët. "Europa këtë rajon e sheh si një tërësi dhe prandaj në interes të përbashkët kemi të bashkëpunojmë që sfidat politike dhe ekonomike t'i zgjidhim me dialog dhe me bashkëpunim. Është e nevojshme që t'i thellojmë marrëdhëniet në bazë të interesave dhe qëllimeve të përbashkëta për të ardhmen tonë në Bashkimin Europian. Kemi shumë sfida me të cilat ballafaqohemi, por ne duhet të fokusohemi te ndërtimi i së ardhmes më të mirë për qytetarët tanë", u shpreh ministri serb i Ekonomisë. Projekti për ndërtimin e autostradës së Nishit, sipas Knezevic, do të sillte përveçse forcim të mëtejshëm të bashkëpunimit dypalësh, edhe pagëzimin e rrugës së kombit me një emër të ri tejet kuptimplotë, siç është "Autostrada e Paqes".