Demiraj tregon bisedën me Çakon: Refuzoi të shkarkonte 120 policët

Ish- ministri i Brendshëm teknik, Dritan Demiraj deklaron se gjatë kohës që mbante detyrën e ministrit, i ka propozuar Drejtorit të Përgjithshëm të Policisë, Haki Çako, një listë me 120 drejtues dhe efektivë të Policisë, të implikuar në trafikun e kanabisit, por ky i fundit ka refuzuar t'i shkarkojë. Në një intervistë për "Kjo Javë" të gazetares Nisida Tufa në "News 24", Demiraj ka theksuar se ka informacione se ministri i Brendshëm, Fatmir Xhafaj është duke u marrë me listën dhe një pjesë e këtyre policëve do të largohen. "Kam pasur një listë me drejtues të Policisë së shtetit. Që kur kam thirrur Drejtorin e Përgjithshëm të Policisë për largimin e disa personave, më është justifikuar duke më thënë se përse t'i largoj. I kam nxjerrë listën me 120 persona, për të cilët kam informacion të saktë që z. Xhafaj është duke u marrë me identifikimin e këtyre personave dhe gjykoj që një pjesë e tyre do të largohen nga Policia", deklaron Demiraj. Sipas ish- ministrit, Çako ka përgjegjësi për përfshirjen e drejtuesve të komisariateve në trafikun e drogës, por ai qëndron në detyrë për shkak të një kontrate të arritur me Kryeministrin përpara zgjedhjeve parlamentare. "Unë kam qenë i vetmi ministër në mbështetje të Drejtorit të Përgjithshëm të Policisë, Haki Çako, në kohën kur e godiste fuqishëm LSI, por edhe pse më pak PD. Ajo që e mban z. Çako në detyrë, sipas meje, është një marrëveshje, e cila është bërë para zgjedhjeve, në të cilën atij i është kërkuar të bllokojë ministrin teknik sa më shumë të jetë e mundur. Në disa raste, unë kam denoncuar drejtues komisariatesh, të cilët ishin pa diskutim të përfshirë në vjedhjen e votave dhe pjesë e kanabizimit", sqaron ish- ministri. Demiraj paralajmëron se nga partnerët do të dalin në skenë përgjime të reja, në të cilat do të dalin të përfshirë edhe disa ish- drejtorë qarqesh në Policinë e Shtetit, të implikuar në trafik, por që janë arratisur. "Gjykoj se edhe z. Xhafaj ka përgjegjësi, sepse në një formë apo në një tjetër këto janë pjesë e Drejtorisë së Përgjithshme të Policisë së Shtetit dhe të z. Xhafaj drejtpërsëdrejti. Gjykoj se jo vetëm këto tri arrestime, por edhe arrestime të tjera që do të dalin nga përgjimet në vazhdim, jo vetëm të italianëve, por edhe nga shërbimet e agjencive të tjera, duhet që Policia e Shtetit t'i mbajë njerëzit që janë përfshirë në këto trafiqe në mbikëqyrje dhe të mos justifikohet duke thënë se ishte apo jo në dijeni.

Janë disa ish- drejtorë qarqesh, të cilët për etikë nuk u përmend emrin, sepse janë nën hetim, janë larguar nga Shqipëria. Edhe për këta ish- drejtorë, së shpejti do të dalin urdhërarreste, ndërkohë që atyre u është mundësuar largimi jashtë vendit. Po flasim për ish- drejtorë qarqesh", deklaron Demiraj.