U nis nga Shqipëria, kapet pas 48 orësh gomonia me kanabis
Ndaj trafikantëve u qëllua me snajper. Mjeti lundrues u pikas në veri të Korfuzit
Roja Bregdetare greke ka finalizuar me sukses operacionin më të madh në historinë e saj, pas një ndjekjeje të gjatë të një gomoneje të ngarkuar me lëndë narkotike.
Pas informacioneve të siguruara prej disa javësh, Drejtoria Kundër Drogës, ra në gjurmët e një mjeti lundrues të ngarkuar me sasi të madhe hashashi. Gomonia e shpejtësisë së lartë me tri motorë nga 350 kuaj fuqi, kishte në bord tri persona. Siç raportojnë mediat greke, operacioni nisi të premten në mbrëmje dhe përfundoi pas 48 orësh. Gomonia me tre skafistë u pikas nga Roja Bregdetare e Greqisë në pjesën veriore të Korfuzit dhe është ndjekur deri në brigjet e ishullit Tria në Athinë. Operacioni është zhvilluar nga ajri dhe deti. Gomonia e drejtuar nga tre skafistë, një shqiptar, një grek dhe një turk, u ndal vetëm pasi u qëllua me snajper nga helikopteri i Policisë. Por, edhe skafistët janë kundërpërgjigjur me zjarr nga ana e tyre duke qëlluar mbi helikopter. Në fund, forcat e Policisë kanë vënë në pranga tre skafistët, por nuk bëhet i ditur identiteti i tyre. Gjithashtu, autoritetet ligjzbatuese nuk japin detaje as për sasinë e lëndës narkotike që u gjet në gomone. Por, mediat greke shkruajnë se ka dyshime se gomonia është ngarkuar me lëndë narkotike në brigjet e Shqipërisë dhe po trafikohej drejt Greqisë. Pas sekuestrimit të kanabisit që gjendej në bord, gomonia është transportuar drejt Pireut. Mediat e vendit fqinj raportojnë se autoritet greke kish- in siguruar informacion për trafikimin e një sasie të madhe droge dhe po vëzhgonin koordinatat, që po ndiqnin trafikantët në Detin Jon. Gjatë operacionit, Greqia mobilizoi mjetet më të shpejta detare, si dhe gomonia u ndoq edhe nga ajri me avion dhe helikopter. Sipas mediave greke, ky është operacioni i dytë më i gjatë, që u mbyll me sukses me arrestimin e trafikantëve në prill të këtij viti në Detin Jon.