PD e akuzon se udhëtoi disa herë me makinën e Habilajve, Gjebrea: Nuk kam asgjë të paligjshme
REAGIMI I ISH- ZV. MINISTRES PER MAKINEN E TAHIRIT. XHAFAJ: PROKURORIA TE TREGOJE KUSH I VEZHGOI POLICET
Ministri i Brendshëm, Fatmir Xhafaj, ka deklaruar dje se dekonspirimi i aksionit të Prokurorisë për të arrestuar 3 ish- drejtuesit e Policisë së Vlorës nuk ka ndodhur nga Policia e Shtetit.
Xhafaj u ka kërkuar gazetarëve që të pyesin Prokurorinë se kujt ia ka lënë detyrën për të mbajtur nën vëzhgim ish- drejtuesit e Policisë. "Në momentin që është vënë në dijeni Policia, atëherë ka filluar procesi i mbikëqyrjes nga Policia. Përpara këtij fakti nuk ka pasur dijeni Policia ose, më saktë, nuk i është lënë kjo detyrë Policisë. Deri në datën 22 që ka marrë aktet, SHÇBA- ja nuk ka pasur dijeni për këtë gjë, ju thashë. Çfarë ka ndodhur më përpara duhet të pyesni Prokurorinë se më kë e ka pasur nën vëzhgim, jo Ministrinë", tha dje Xhafaj. Ai më tej ka deklaruar se ky nuk ishte një dështim i operacionit "Forca e Ligjit", pasi sipas tij ky operacion merret vetëm me grupe të strukturuara kriminale. Por, pas insistimit të gazetarëve se tre ishdrejtuesit e Policisë akuzohen nga Prokuroria se janë pjesë e bandës së "Habilajve", Xhafaj deklaroi se do të presë kur t'i vijë zyrtarisht ky pretendim nga Prokuroria. Dy ditë më parë, Policia e Shtetit shkoi për të arrestuar në banesën e tij ish- drejtorin e Policisë së Vlorës Jaeld Çela, ish- shefin e Postës Kufitare Dhërmi, Sokol Bode, dhe ishshefin e Krimeve të Rënda dhe Krimit të Organizuar në Drejtorinë e Vlorës, Gjergji Kohilën, por nuk gjeti asnjërin prej tyre. PYETJET DHE PËRGJIGJET ME FATMIR XHAFAJN Si ka mundësi që arratisen mes ditës tre ish- zyrtarë
të lartë të Policisë së Shtetit?
Xhafaj: Së pari, ne nuk e dimë në mes të ditës , apo natës. Këtë mund ta dini ju. Nëse keni ndonjë fakt plus, është mirë që t'ia jepni Prokurorisë. Së dyti, që është e rëndësishme, nuk ka qenë nën vëzhgimin tonë. Në momentin që është vënë në dijeni Policia, atëherë ka filluar procesi i mbikëqyrjes nga Policia. Përpara këtij fakti, nuk ka pasur dijeni Policia ose, më saktë, nuk i është lënë kjo detyrë Policisë.
I është lënë SHÇBA- së. Atëherë i bie që është dekonspiruar nga SHÇBA- ja. Prokuroria ia ka lënë detyrë SHÇBA- së të mbajë në vëzhgim këta persona.
Xhafaj: Nuk është e vërtetë. Duhet të merreni informacion më të plotë, për shkak sepse deri në datën 22 që ka marrë aktet, SHÇBA- ja nuk ka pasur dijeni për këtë gjë, ju thashë. Çfarë ka ndodhur më përpara, duhet të pyesni Prokurorinë se më kë e ka pasur nën vëzhgim, jo Ministrinë.
A ishte ky një operacion i dështuar? Një goditje që merr operacioni "Forca e Ligjit", që është trumbetuar me forcë nga ana juaj.
Xhafaj: Po ç'lidhje ka kjo me operacionin "Forca e ligjit"?!
Po duke qenë se me anë të operacionit të "Forcës së Ligjit" do të arrestohen të gjithë personat e botës së krimit. E për sa kohë ka urdhërarreste e urdhërndalime për tre ish- zyrtarë...
Xhafaj: E para njëherë, të arrestohen të gjithë ata që kërkohen është detyrë e përhershme e Policisë së Shtetit, pavarësisht nga emërtimet e operacioneve. E dyta, operacioni "Forca e Ligjit" është për grupet e strukturuara kriminale. Unë nuk di, për rastin në të cilin ju po flisni, është pjesë, është për një grup të strukturuar kriminal.
Akuza është për trafik droge në kuadër të një grupi të strukturuar kriminal, z. Xhafaj. Kjo është akuza.
Xhafaj: Kur të vijë kjo gjë nga Prokuroria në mënyrë të tillë, patjetër. Por nuk ka lidhje kjo se çfarë grupi është. E rëndësishme është se kushdo që i shmanget drejtësisë, duhet të jetë pjesë e objektit të punë së Policisë për të shkuar para drejtësisë. Kjo është e sigurt.
Për ish- zyrtarët e Policisë, janë për trafik droge dhe si pjesë e një grupi të strukturuar kriminal...
Xhafaj: Në Shqipëri ka shumë grupe të strukturuara kriminale. Po flasim për grupe të strukturuara kriminale në kuptimin që jep Kodi Penal. Dhe në këtë kontekst dhe ato për të cilat janë pjesë e atij operacioni. Natyrisht që ky proces sapo ka filluar. Kini durim ju dhe gjithë të tjerët se çfarë do të thotë.
Si janë marrëdhëniet e Ministrisë së Brendshme me Prokurorinë, z. Xhafaj?
Xhafaj: Marrëdhënie thjesht institucionale.