Kërcënoi Çalhanoglunë, përfundon në gjyq

Anita Latifi, që u bë e njohur pak vite më parë për pjesëmarrjen në show- n e madh gjerman të talenteve të këndimit, DSDS, është përballur sot në gjyq me futbollistin e kombëtares turke, Çalhanoglu, duke i kërkuar atij 250 mijë euro në këmbim të heshtjes për abortin e saj. Anita u është përgjigjur pyetjeve sot në një gjykatë në Dusseldorf nëse ka tentuar të shantazhojë futbollistin e njohur turko- gjerman Hakan Çalhanoglu, i cili luan për kombëtaren turke, duke i kërkuar atij 250 mijë euro, shkruan bild. de.

Këtë gjë Anita Latifi akuzohet se e kishte bërë në bashkëveprim me gazetarin Abdel H. Sipas padisë, Abdel H. në korrik të vitit 2016 i kishte telefonuar këshilltarit të Çalhanoglusë, duke iu drejtuar me fjalët se Çalhanoglu duhet të paguajë 250 mijë euro për abortimin e fëmijës që gjoja kishte bërë ylli i DSDS. Ai e kishte kërcënuar duke i thënë se karriera e tij mund të vazhdonte vetëm pasi të paguante këtë "gjobë".

Por, sipas akuzës, Anita Latifi nuk ka qenë ndonjëherë shtatzënë, ndonëse ajo vetë thotë se ka qenë, gjë të cilën e ka deklaruar edhe nëpër intervista nëpër media të ndryshme gjermane. Në televizionin Sat 1, Anita ka thënë se aq shumë presion i është bërë nga futbollisti që nuk pranonte atësinë, saqë ajo ishte detyruar në fund të abortonte.

Gjatë marrjes në pyetje, gazetari dhe këngëtarja, sipas akteve hetimore, i kanë kundërshtuar të gjitha. Por prokurori është i sigurt se ata të dy janë fajtorë. Veç të tjerash, edhe për faktin se Latifi në gazeta ka dhënë versione të ndryshme të ngjarjes.

Çalhanoglu e ka dhënë për herë të parë sot dëshminë, gjatë së cilës ka thënë se gjithçka ka filluar në vitin 2013, kur ai ishte duke luajtur për HSV. "Ne kemi pasur miqësi të ngushtë e po ashtu edhe kemi fjetur bashkë. Por unë gjithmonë kam pasur kujdes dhe jam ruajtur", ka thënë ai. Ndërsa lidhja mes tyre kishte përfunduar para fillimit të pauzës dimërore të Bundesligës. Procesi do ta ketë seancën e radhës më 20 dhjetor.