Meta: Të evidentohen dëmet e përmbytjeve

“S’duhet të ulim vigjilencën, kemi hyrë në kulmin e dimrit”

Presidenti Ilir Meta ka vizituar dje zonat e prekura nga përmbytja, në Ferras të Fierit, dhe në qytetin e Beratit. Në këtë takim, Meta është shoqëruar nga shefi i Shtabit të Përgjithshëm të Forcave të Armatosura, Bardhyl Kollçaku, me të cilin takuan nga afër përfaqësues të institucioneve të angazhuara në operacionin për t’u ardhur në ndihmë banorëve të prekur nga përmbytjet. Meta i falënderoi për punën e bërë nga të gjitha autoritetet shtetërore në përballimin e situatës së krijuar nga reshjet e ditëve të fundit. Një falënderim të veçantë Presidenti Meta bëri për mbështetjen e ardhur nga Kosova. “Dua t’ju falënderoj për punën tuaj, të Ushtrisë, të Prefekturës, të Shtabit të Emergjencave, jo vetëm këtu në Fier, por kudo, të Policisë. Një falënderim të veçantë për forcat speciale të ardhura nga Kosova për ndihmën dhe mbështetjen e tyre. Të gjithë jemi dëshmitarë të kapriçove të natyrës, përveç problemeve që edhe ne vetë i kemi krijuar, duke nënvlerësuar ligjet e natyrës”, ka thënë ai. Meta ka kërkuar gjithashtu nga institu- cionet që të evidentojnë çdo përmbytje dhe çdo dëm të shkaktuar nga përmbytja. “Por për fat të mirë, eksperiencat e së kaluarës kanë qenë mjaft pozitive për të përballuar këtë proces për të mos pasur humbje të jetës së njerëzve, për të mos pasur as dëme serioze sa i takon gjësë së gjallë, të cilat kanë ndodhur në përmasa të mëdha në të kaluarën. Megjithatë, çdo përmbytje ka dëmet e saj dhe është e rëndësishme që edhe këto të evidentohen. Dua të shpreh mirënjohjen, sidomos për forcat e Ushtrisë, që kanë bërë operacione të vështira, dhe falë këtij angazhimi të tyre, të Poli- cisë dhe të pushtetit vendor ne kemi një situatë më pozitive, gjë që nuk duhet të na ulë vigjilencën, pasi kemi hyrë në kulmin e dimrit dhe përballë kapriçove të kohës duhet të qëndrojmë gjithmonë syhapur për arsye sepse dihen këto eksperienca”, është shprehur Presidenti.