Trump: Nuk ka pasur asnjë pakt të fshehtë me Rusinë
Ish- këshilltari i Sigurisë deklarohet fajtor, bashkëpunon me Mueller
Presidenti i Shteteve të Bashkuara, Donald Trump, theksoi të shtunën qëndrimin e tij se, nuk ka ekzistuar asnjë lloj bashkëpunimi apo marrëveshje e fshehtë ndërmjet stafit të fushatës së tij presidenciale dhe agjentëve të qeverisë së Rusisë.
Trump tha shkurtimisht para gazetarëve në Shtëpinë e Bardhë se, “nuk ka pasur absolutisht marrëveshje të fshehtë”. Komentet e Presidentit amerikan u bënë një ditë pasi ish- këshilltari i tij për Siguri Kombëtare, Michael Flynn, pranoi fajësinë se ka gënjyer FBI- në në lidhje me kontaktet e tij me ambasadorin rus, gjatë periudhës tranzitore ndërmjet nëntorit 2016 dhe janarit 2017, saktësisht dhjetorin e kaluar, përpara se Trump të inaugurohej në Shtëpinë e Bardhë. Michael T. Flynn u bë kështu zyrtari i parë i lartë i Shtëpisë së Bardhë, që arrin një marrëveshje bashkëpunimi në hetimin e gjerë për ndërhyrjen e Rusisë në zgjedhje.
Dokumentet nuk zbu- lojnë çfarë dinte Trump për diskutimet e Flynn. Por të paktën në një rast, sipas prokurorëve, Flynn ishte orientuar nga një zyrtar shumë i lartë i ekipit të tranzicionit presidencial për të diskutuar një rezolutë të Kombeve të Bashkuara. Avokatët e Presidentit Trump besojnë se ndihmësi i lartpërmendur ishte dhën- dri dhe këshilltari i ngushtë i Trump, Jared Kushner, sipas avokatëve që kanë lidhje me çështjen. Diskutimet e Flynn me ambasadorin rus, Sergey I. Kislyak, ishin pjesë e një përpjekjeje të koordinuar nga ndihmësit e Trump për të krijuar një politikë të jashtme përpara se të merrnin pushtetin, sipas dokumenteve të publikuara nga marrëveshja e Flynn. Përpjekjet e tyre kanë minuar politikat ekzistuese të Presidentit Barack Obama në atë kohë dhe kanë nxitur paralajmërime nga zyrtarë të larta të administratës Obama për të ndaluar ndërhyrjen përpara inaugurimit. Hetimet për ndërhyrjen e Rusisë në zgjedhje po drejtohen nga prokurori i posaçëm, Robert Mueller. Flynn ishte ndër mbështetësit e parë të Trump gjatë fushatës presidenciale dhe një kritik i fuqishëm i demokrates, Hillary Clinton. “Nuk kemi nevojë për një Presidente të pamatur, që beson se është mbi ligjin”, ka deklaruar ai gjatë fushatës. Flynn, po ashtu, iu bashkua delegatëve republikanë që bënin thirrje që Clinton të burgosej. Por të premten, ndërsa ai dilte nga Gjykata, protestuesit thërrisnin “burgoseni”. Avokati i Shtëpisë së Bardhë, Ty Cobb, lëshoi një deklaratë ku thuhet se pranimi i fajësisë nga Flynn nuk implikon askënd tjetër përveç atij vetë. Por pranimi nga Flynn se ai po bashkëpunon me prokurorin e posaçëm, mund të shkaktojë probleme në të ardhmen për Presidentin.