Përmbytjet, Shehu: Bashkia të kompensojë bizneset e shkatërruara
Deputeti Tritan Shehu ka takuar nga afër qytetarët dhe bizneset e dëmtuara për shkak të përmbytjeve. Bizneset në qytet kanë pësuar dëme të mëdha, ndërsa Dropulli është pothuajse i izoluar. Deputeti Shehu kërkoi që bashkia dhe qeveria të ndihmojnë qytetarët me ndihmë financiare. “Do të kërkojmë që Këshilli Bashkiak i Gjirokastrës të miratojë mbështetje financiare për aktivitete të tilla ekonomike të dëmtuara rëndë nga përmbytjet. Ndryshe pasojat do të jenë shkatërruese jo vetëm për ato biznese, por edhe për ekonominë në agoni të qarkut të Gjirokastrës”, tha Shehu. Deputeti i PD- së vizitoi edhe Bashkinë e Dropullit, ku situata është problematike. “Janë shembur 5 ura dhe dëmtuar kilometra rrugë që kanë izoluar tërësisht rreth 400 familje të asaj zone. I vetmi komunikim i mbetur për ata është ai me Greqinë. Dëmi llogaritet në rreth 1 miliard lekë të vjetra”, u shpreh Shehu. Deputeti demokrat pati një takim edhe me mjekët e spitalit të Gjirokastrës, të cilët i falënderoi për gatishmërinë e treguar, pavarësisht problematikës së sistemit shëndetësor në qarkun e Gjirokastrës, që tregoi se nuk përballon situata të tilla madhore as me personal, specialistë, pajisje dhe furnizime. “Ndërprerja e lidhjeve të Gjirokastrës me Tepelenën e Përmetin nxori në pah situatën e degraduar të spitaleve të dy bashkive të tjera. Po kështu, ndërprerja e lidhjeve me periferitë e bashkive tregoi gjendjen shumë të rëndë të qendrave shëndetësore në të gjithë qarkun”, tha deputeti Shehu.