Përmbytjet, 3 biznese denoncojnë ndërhyrjet në përroin e Limuthit

Pas dëmeve të shumta materiale që shkaktuan përmbytjet në autostradën Tiranë– Durrës, janë depozituar edhe kallëzimet e para në Polici. Në Komisariatin e Vorës janë paraqitur 3 biznesmenë dhe disa qytetarë, të cilët pretendojnë se përmbytjet kanë ardhur si pasojë e ndërhyrjeve të paligjshme në përroin e Limuthit. Burime nga Policia thanë se në Komisariatin e Vorës janë paraqitur shtetasit me iniciale S. P., 47 vjeç, pronari i një firme private, F. K., 57 vjeç, pronar i një servisi mjetesh, si dhe shtetasja B. D., administratore e një firme private, përfaqësues të një qendre tregtare, si dhe disa banorë të tjerë të zonës. “Ata janë ankuar se përmbytjet kanë ardhur si pasojë e ndërhyrjeve të bëra në përroin e Limuthit. Materialet u referuan në Prokurorinë e Rrethit Gjyqësor Tiranë, për vlerësim”, tha dje Policia e Tiranës. Ndërsa ditën e premte, në vendin ku ndodhën përmbytjet, ishte i pranishëm edhe një prokuror i Tiranës, Ervin Karanxha, i cili ftoi të gjithë personat që kanë pësuar dëme nga përmbytjet që të paraqiten në Prokurori, bashkë me vlerën e dëmit. Ai tha se paraprakisht ka nisur një fazë verifikimi, për të mësuar nëse ka elementë të veprës penale. “Do verifikohet nëse ka apo jo elementë të veprës penale që shkaktuan përmbytjet, gjithmonë në koordinim me Policinë e Shtetit. Nga këqyrja e vendit të ngjarjes do saktësohen se cilat janë ndërtimet pa leje dhe cilat janë me leje, për të provuar se kush ka sjellë dëmin. Edhe palmat do të jenë objekt hetimi, por ne këtu, te vendi i përmbytjes nuk shohim ndonjë palmë. Ne flasim për pjesën ku është shkaktuar dëmi. Objekt i verifikimit do të jenë të gjitha shqetësimet e qytetarëve. Do regjistrohet një kallëzim penal dhe do të verifikohen të gjitha”, u shpreh Karanxha.