Rama me Presidentin e KE, Basha: Ka stepje për negociatat
“Tahiri dhe largimi i 3 oficerëve lanë shije shumë të hidhur”
Kryetari i opozitës, Lulzim Basha, nga Brukseli, ku po merr pjesë në Samitin e Partive Popullore Europiane, ka ngritur shqetësimin për ekzistencën e një stepjeje të vendeve të BE- së sa i takon Shqipërisë.
Në një deklaratë të dhënë nga Brukseli, Basha ka theksuar se imuniteti parlamentar që iu dha ish- ministrit Tahiri dhe largimi i 3 oficerëve madhorë, pasi u vunë nën akuzë, lanë një shije të hidhur te partnerët. “Për fat të keq, ajo që vërej është një stepje e madhe e përfaqësuesve të vendeve anëtare të Bashkimit Europian sa i përket Shqipërisë. Në veçanti, shqetësime të mëdha në drejtim të shtetit ligjor, luftës kundër krimit, luftës kundër korrupsionit. Pa dyshim që episodi ‘ Tahiri’ dhe mbrojtja e tij politike me imunitet parlamentar, si dhe largimi në drejtim të paditur i 3 oficerëve madhorë, pasi ata u vunë nën akuzë dhe u kërkua arrestimi në lidhje me trafikun e drogës, kanë lënë një shije shumë të hidhur”, tha Basha. Kreu i PD- së theksoi se nga takimi që po zhvillohet në Bruksel, ka konstatuar se vendet e BE- së ngrenë për Shqipërinë të njëjtat shqetësime që ka ngritur edhe opozita në 4 vite. “Avantazhi i të qenët në këtë takim është se vendet anëtare po ngrenë probleme që opozita ka 4 vjet që i denoncon, kriminalizimin e politikës, mbulimin e Shqipërisë me drogë, qindra milionë euro të drogës që po qarkullohen nga grupe kriminale edhe përmes kanaleve të ekonomisë informale, duke i dhënë krimit fuqi ekonomike dhe politike, siç u faktua në zgjedhjet e 25 qershorit. PD i ka paralajmëruar këto, i ka bërë të ditura dhe ka kërkuar ndihmën e Bashkimit Europian, institucioneve të BE- së dhe vendeve anëtare”, deklaroi kreu i PD- së.
INTEGRIMI Gjatë deklaratës së tij, Basha ka nënvizuar faktin se rezervat që vendet e BE- së kanë ndaj Shqipërisë, mund të pengojnë rrugën integruese të vendit në BE, nga e cila do të penalizohen të gjithë shqiptarët. Sipas kreut të PD- së, shqiptarët po ndiejnë efektet e para të shtrëngimeve nga vendet e BE- së që kanë nisur me paralajmërimet për rivendosjen e vizave dhe skepticizmi për të hapur negociatat. “Disavantazhi është që shumica dërrmuese e vendeve anëtare janë bërë shumë të ndërgjegjshme për këto probleme. Kjo mund të pengojë rrugën europiane të Shqipërisë, duke ndëshkuar qytetarët shqiptarë, shumica dërrmuese e të cilëve nuk kanë lidhje as me kultivimin e drogës, as me trafikun e drogës, por janë ata që ndiejnë efektet e para negative, siç janë shtrëngesat e lëvizjes së lirë apo edhe kërcënimet në disa raste për kthimin e vizave për shqiptarët, siç është edhe skepticizmi i madh, me të cilin po përballen vendet anëtare sa i përket procesit të hapjes së negociatave me Shqipërinë”, u shpreh Basha.
OPOZITA Basha ka theksuar se gjendja e jashtëzakonshme që po kalon vendi nuk e kënaq opozitën, e cila do të vazhdojë të denoncojë lidhjen e politikës me krimin. Për kreun e PD- së, zgjidhja që i duhet dhënë vendit në këtë situatë është një qeveri antimafia, e cila të bëjë të mundur avancimin e interesave europiane të vendit. “Kjo është një gjendje jashtëzakonisht e papëlqyeshme për ne si opozitë. Kjo është zgjidhja e një qeverie antimafea, që do të shkëpusë lidhjet e krimit me politikën, që do të përgatisë një reformë të vërtetë zgjedhore dhe do ta çojë vendin me sukses drejt një qeverie legjitime, përmes zgjedhjeve të lira e të ndershme”, tha Basha.