Rama i quan “spektakolare” pamjet nga Semani, Basha: Fillo dëmshpërblimet
Kryeministri Edi Rama dhe kreu i opozitës Lulzim Basha, pas kalimit të situatës së përmbytjeve, u janë rikthyer akuzave ndaj njëri- tjetrit. Ishte kreu i qeverisë që mëngjesin e së hënës postoi pamjet nga lumi i Semanit, duke e cilësuar këtë pamje si spektakolare. “Me këtë pamje spektakolare nga lumi Seman, i tërhequr tanimë në shtratin e tij, ju uroj një fillimjave të mbarë. Faza e emergjencës kaloi, duke shënuar dëme shumë herë më të vogla se disa vjet më parë; gatishmëria dhe angazhimi maksimal vijojnë për rimëkëmbjen e çdo zone dhe çdo familjeje të prekur prej motit të tërbuar të tri ditëve të shkuara”, u shpreh Rama në foton e publikuar të lumit të Semanit. Por, ndryshe nga Rama, kreu i opozitës ka kujtuar se s’ka parë asgjë spektakolare në qytetet që ka vizuar dhe ka kërkuar që të nisin menjëherë dëmshpërblimet.
“Nuk ka asgjë spektakolare në Darzezë, në Ferras e në shumë fshatra të tjera të Fierit, ku balta ka mbuluar dhjetëra shtëpi e ka shkaktuar dëme të rënda materiale. Dhe në Dërmenas po ashtu.
Asgjë spektakolare nuk ka në Novoselë e në zona të tjera të Vlorës ku, si pasojë e përmbytjeve, ka mungesa bazike, nga ushqimet te dritat dhe uji. Spektakolare është përpjekja për ta nxjerrë këtë fatkeqësi në media e në ekrane si sukses qeveritar!
Spektakolare është braktisja e qytetarëve nga qeveria dhe lënia nën mëshirë të fatit pas asnjë ndihmë! Edi Rama duhet ta lërë propagandën e t’u zgjidhë hallet mijëra familjeve, që janë prej tri ditësh pa ujë, pa ushqime e drita! Edi Rama duhet t’i dëmshpërblejë për humbjet e pallogaritshme që kanë pësuar, pasi dimri është i gjatë dhe i papërballueshëm në këto kushte”, tha Basha.