Presidenti i KE, Tusk: Vlerësojmë reformat, keni miq në Bruksel
“Ju jeni një nga shembujt më të mirë në rajon të kësaj ambicieje europiane dhe të kësaj ëndrre europiane”
Presidenti i Këshillit Europian, Donald Tusk, ka vlerësuar procesin e thellë të reformave, që ka ndërmarrë qeveria shqiptare, ndërsa është shprehur se është në anën e Shqipërisë për në BE.
Këtë deklaratë Donald Tusk e bëri pas takimit që zhvilloi në Bruksel me Kryeministrin Edi Rama. “Pikësëpari, ju faleminderit për mirëkuptimin, i dashur Kryeministër, i dashur Edi. Jam vërtet i lumtur t’ju shoh këtu, pasi, siç e dini, jemi në të njëjtën anë. Për mua është vërtet e rëndësishme që të jem me ju dhe me të gjithë miqtë e mi shqiptarë, sa më i hapur, i sinqertë dhe pozitiv të jetë e mundur”, u shpreh Tusk në një konferencë të përbashkët për shtyp me Kryeministrin Rama. Për kreun e Këshillit Europian, Shqipëria ka miq në Bruksel, ndërsa qeveria shqiptare vlerësohet për guximin në zhvillimin e reformave. “Kjo nënkupton gjithashtu se bashkëpunimi ynë, bisedimet tona, sot dhe në të ardhmen, ishin mbi bashkëpunimin e ardhshëm dhe të ardhmen europiane. Siç e dini, keni vetëm miq këtu në Bruksel, ndoshta jo në çdo kryeqytet, por të jeni i bindur që këtu në Këshillin Europian mund të jeni të sigurt për mbështetjen tonë për përpjekjet tuaja. Dua të rikonfirmoj se ne e vlerësojmë vërtet procesin tuaj të thellë dhe mjaft të guximshëm të reformave.
Ju jeni një nga shembujt më të mirë në rajon të kësaj ambicieje europiane dhe të kësaj ëndrre europiane”, u shpreh dje Presidenti i Këshillit Europian, Donald Tusk. Nga ana e tij, Kryeministri Rama e vlerësoi Donald Tuskun si një nga mbështetësit më të mëdhenj për përafrimin e Shqipërisë me Bashkimin Europian. “E falënderova që na dha mundësinë e këtij takimi me gjithë të gjendurit në një ditë shumë intensive takimesh me Kryeministren britanike. Po ashtu, dua t’i shpreh mirënjohjen, që është një ndër mbështetësit më të mëdhenj të përafrimit të mëtejshëm të Ballkanit, por edhe të Shqipërisë me Bashkimin Europian”, u shpreh Kryeministri Rama. Turi i takimeve të Kryeministrit Rama në Bruk- sel lidhet me prezantimin e arritjeve të reformave, që qeveria shqiptare ka ndërmarrë, nisjen nga puna të Reformës në Drejtësi për të përgatitur klimën e duhur, për të dhënë një rekomandim pozitiv për hapjen e negociatave të BE- së me Shqipërinë gjatë vitit 2018. Pritet që pranverën e ardhshme të ketë një raport pozitiv progresi të Komision- it Europian për Shqipërinë. Gjatë vitit 2017, Komisioni nuk publikoi raport progresi për asnjë vend, ndërkohë që Shqipëria kishte si kushte Reformën në Drejtësi dhe fillimin e procesit të vetingut për prokurorët dhe gjyqtarët, zgjedhjet e lira dhe të ndershme, respektimin e minoriteteve, luftën kundër trafiqeve dhe kanabisit.
Bashkëpunimi ynë, bisedimet tona, sot dhe në të ardhmen, ishin mbi bashkëpunimin e ardhshëm dhe të ardhmen europiane. Siç e dini, keni vetëm miq këtu në Bruksel, ndoshta jo në çdo kryeqytet, por të jeni i bindur që këtu në Këshillin Europian mund të jeni të sigurt për mbështetjen tonë për përpjekjet tuaja. Dua të rikonfirmoj se ne e vlerësojmë vërtet procesin tuaj të thellë dhe mjaft të guximshëm të reformave. Ju jeni një nga shembujt më të mirë në rajon të kësaj ambicieje europiane dhe të kësaj ëndrre europiane”