Xhafaj për Prokurorinë: Bashkëpunim pas Reformës në Drejtësi

Në një kohë kur Prokurorit të Përgjithshëm po i mbaron mandati, ministri i Brendshëm, Fatmir Xhafaj, flet për një marrëdhënie më të besueshme me institucionin e akuzës, pas Reformës në Drejtësi. Duke folur për planin operacional “Forca e Ligjit”, por edhe nisma të tjera të Policisë së Shtetit, sipas tij, rezultatet do të jenë larg, në mungesë të një bashkëpunimi të frytshëm. “Këto nisma vijnë në kohën e duhur, mbështeten dhe janë në sinkron me procesin e Reformës në Drejtësi, që ka hyrë në fazën e saj më të rëndësishme: vetingun në radhët e gjyqtarëve dhe prokurorëve, ku presim shumë shpejt të shohim rezultatet e para të këtij procesi si dhe në fazën e ngritjes së institucioneve të reja të sistemit të drejtësisë. Gjithsesi, çfarëdo nisme dhe sado iniciativë të ketë nga ana jonë, rezultatet do të jenë larg, në mungesë të një bashkëpunimi të frytshëm midis nesh”, u shpreh Xhafaj gjatë konferencës mbi bashkëpunimin ndërkombëtar në luftën kundër krimit të organizuar.

FORCA E LIGJIT Gjatë kësaj konference, që u zhvillua nga Policia e Shtetit dhe Zyra e Sigurisë pranë prezencës së OSBE, ministri i Brendshëm u ndal edhe te plani i veprimit kundër krimit të organizuar që u miratua nga qeveria muajin e kaluar. “Operacioni ‘ Forca e Ligjit’, i cili ka si objektiv pikërisht këtë, goditjen e grupeve kriminale dhe aseteve të tyre të paligjshme, ka një qasje gjithëpërfshirëse ndërinstitucionale dhe ndërkombëtare”, tha Xhafaj. Duke theksuar se ka përfunduar faza paraprake, ajo e katalogimit të grupeve kriminale me të dhëna për persona; lidhjet e tyre kriminale; aktivitetet e rënda kriminale të dyshuara se kryhen prej tyre; pasuritë që zotërojnë, investimet ekonomike të bëra me të ardhura nga aktiviteti kriminal; zonat e ndikimit; lidhjet me grupe të tjera jashtë vendit apo mbështetjet e siguruara në vite për të lehtësuar veprimtarinë e tyre. I pyetur nga gazetarët për shifra konkrete në lidhje me grupet kriminale, përgjigjja e Xhafajt ishte disi ironike edhe në lidhje me paraardhësin e tij, ish- ministrin e Brendshëm, Saimir Tahiri, duke thënë se është ministër dhe jo shef i operacioneve apo drejtor Policie. “Unë nuk jam këtu për të thënë gjëra që nuk më takojnë mua. J’ua kam thënë dhe një herë tjetër, unë jam ministër, që i di detyrat e mia, sipas Kushtetutës dhe ligjit. Unë nuk jam shefi i operacioneve, nuk jam drejtori i Policisë. Jam ministër i Brendshëm dhe bëj detyrat dhe flas për atë që i takon ministrit të Brendshëm. Atë që u takon oficerëve të Policisë, duhet të pyesni oficerët e Policisë”, u shpreh Xhafaj.

MARREDHENIA ME PROKURORINE Gjatë prononcimit pas përfundimit të konferencës, ministri i Brendshëm u pyet nga gazetarët edhe për dokumentimin ligjor të grupeve kriminale. Por Xhafaj tha se në këtë proces, ka detyra dhe përgjegjësi edhe Prokuroria. “Nëse ju do të më thoshit mua që një shkrim e bëni, ose një intervistë, e bëni sapo mbyllni kamerën, unë nuk e besoj. Ju duhet edhe një proces tjetër. Dhe ky është një proces, jo më pastaj identifikimi, zbulimi, gjurmimi dhe krijimi i provave të nevojshme për t’i çuar përpara përgjegjësisë penale. Dhe ky do të jetë një proces, në të cilin Policia ka detyrat dhe përgjegjësitë e veta, prokuroria gjithashtu ka detyrat dhe përgjegjësitë e veta. Natyrisht, me ndryshimet e rëndësishme që do të pësojë Prokuroria, si rrjedhojë e Reformës në Drejtësi, unë jam shumë i bindur që do të kemi një partneritet tjetër dhe një marrëdhënie shumë më të besueshme seç kemi sot”, tha Xhafaj.