Sejko: Kërkimi ekonomik në thelb të politikave të BSH
“Kërkimi, kontribut për ekonominë dhe tregjet financiare”
Banka e Shqipërisë organizoi dje seminarin e 11- të të Kërkimeve Ekonomike për Europën Juglindore.
Guvernatori i Bankës së Shqipërisë, Gent Sejko, theksoi se kërkimi ekonomik në Bankën e Shqipërisë, ashtu si në bankat e tjera qendrore europiane, është një funksion mjaft i rëndësishëm, i cili ka provuar të jetë i suksesshëm në mbështetje të proceseve të formulimit dhe zbatimit të politikës monetare. “Nga një këndvështrim strategjik, qëllimi kryesor i kërkimit ekonomik është të ofrojë një bazë të fortë konceptuale dhe empirike për politikëbërjen. Kërkimet me cilësi të lartë rrisin besueshmërinë e bankës qendrore dhe përmirësojnë cilësinë e politikave të saj. Ne besojmë fuqimisht se kërkimi cilësor rrit kontributin potencial të bankës qendrore në tregjet financiare, në ekonomi dhe në shoqëri”, u shpreh Sejko. Guvernatori Sejko nënvizoi se gjatë këtij viti, kërkimi në Bankën e Shqipërisë e shtriu aktivitetin e tij duke përf- shirë kërkimet historike. Sipas Sejkos, aktualisht, kërkimi është përqendruar në çështje të ndryshme. “Duke iu kthyer arsyes së mirëfilltë, për të cilën jemi të gjithë sot këtu, së fundmi do të shtoja se, kërkimi është përqendruar në çështje të ndryshme lidhur me: infrastrukturën e tregut financiar dhe ndikimet e mundshme në stabilitetin financiar dhe mbikëqyrjen bankare; zbatimin e standardeve të reja IFRS ( Standardet Ndërkombëtare të Raportimit Financiar); zhvillimin e shpejtë të tregut financiar dhe instrumenteve të tij dhe zhvillimet institucionale në tregjet e brendshme dhe ndërkombëtare”, u shpreh Guvernatori Sejko. Ky seminar, i organizuar për të njëmbëdhjetin vit radhazi nga Banka e Shqipërisë, ka për qëllim të nxisë diskutimin dhe promovimin e kërkimit ekonomik, si dhe bashkëpunimin rajonal në Europën Juglindore. Në këtë aktivitet marrin pjesë përfaqësues të bankave qendrore të rajonit, akademikë nga universitete dhe institucione financiare ndërkombëtare si dhe ekspertë të Bankës së Shqipërisë.