Akademia e të Rinjve, debat mbi kërkimin shkencor në Shqipëri
Konferenca “Metodologjia dhe kërkimi shkencor: traditë dhe risi” i dha udhë dje Akademisë së të Rinjve, një organ kolegjial i Akademisë së Shkencave të Shqipërisë ( ASH), i ngritur në qershor të këtij viti, për të nxitur kërkimin shkencor ndër të rinjtë. Përshëndetën këtë rrugëtim të ri ministrja e Arsimit, Lindita Nikolla, rektori i Universitetit të Tiranës, Mynyr Koni, sekretari Shkencor i Akademisë së Shkencave, Vasil Tole, si dhe përfaqësuesja e Akademisë Botërore të të Rinjve ( Global Young Academy), Connie Nshemereirwe. Në fjalën përshëndetëse, bashkëkryetari i Akademisë së të Rinjve, dr. Andi Rëmbeci, ndër të tjera u shpreh se “në Konferencën II të Përbashkët Shkencore të Procesit të Ballkanit Perëndimor, që u mblodh pranë Akademisë Austriake të Shkencave nga data 22- 24 maj 2016, ndër të tjera u rekomandua që ‘ Sistemet e shkencës dhe të arsimit të lartë në vendet e Ballkanit Perëndimor duhet të bëjnë përpjekje për të qenë të hapura. Ato lipset të .... ndjekin metoda të reja kërkimore dhe të përdorin koncepte të reja organizative’”. Kjo ishte edhe arsyeja pse Akademia e të Rinjve zgjodhi si temën e parë të konferencave pikërisht këtë temë. “Një pjesë e kërkimeve ende realizohen me metoda dhe qasje interpretuese tradicionale, edhe pse prirja mbizotëruese është “reformimi” metodologjik. Kjo ka sjellë, në mënyrë të natyrshme, eviden- time të fakteve të reja, analiza e qëndrime të tjera shkencore, interpretime të ndryshme, në kërkim të së vërtetës shkencore.
“‘ Vërshimi’ i lirë i metodave kërkon, më së pari, edhe një diskutim në lidhje me to, për të qartësuar, përzgjedhur e braktisur metoda të caktuara, që nuk i përgjigjen realitetit të zhvillimit në Shqipëri”, tha Rëmbeci. Në konferencën e djeshme, përfaqësues nga universitete nga e gjithë Shqipëria, trajtuan tema që lidhen me metodologjinë e kërkimit shkencor në fusha të ndryshme të shkencave shoqërore dhe të natyrës, si Belfjore Qose për letërsinë, Mentor Beqja për historinë, Ermela Broci për etnografinë, Sokol Çunga për paleografinë bi- zantine dhe pasbizantine, Mikaela Minga në muzikologji, Rigers Bakiu për mbrojtjen e specieve detare, Blerta Avdia për turizmin etj. Programi i konferencës u jepte hapësira të gjitha fushave të shkencës të diskutonin mbi qasjet metodologjike, problematikën edhe risitë, me shpresën e hapjes së një debati mbi këtë çështje.