Bushati: Presim hapjen e negociatave në 2018
Ministri flet për progres të Shqipërisë në plotësimin e kushteve
Ministri për Europën dhe Punët e Jashtme, Ditmir Bushati, deklaron se duke pasur parasysh progresin e bërë, qeveria pret që 2018 të jetë një vit vendimtar për hapjen e bisedimeve për anëtarësim të Shqipërisë në BE. Kreu i diplomacisë shqiptare, gjatë vizitës që po zhvillon në Bruksel, është takuar me zv. presidentin e Parë të Komisionit Europian, Frans Timmermans dhe Komisionerin për Migrimin, Dimitris Avramopoulos. Bushati bëri një analizë të detajuar të reformave të ndërmarra nga qeveria shqiptare për plotësimin e pesë përparësive kyçe dhe vlerësoi mbështetjen e Komisionit Europian për axhendën europiane të Shqipërisë. Ai nënvizoi se, duke pasur parasysh progresin e bërë, qeveria pret që viti 2018 të jetë vit vendimtar për rrugëtimin europian të Shqipërisë dhe në këtë kuadër, hapja e bisedimeve të anëtarësimit do të konsolidojë angazhimin e pandalshëm në transformimin dhe modernizimin europianizues të vendit. Në takimet e zhvilluara me përfaqësuesit e Komisionit Europian, Bushatit i janë përcjellë vlerësime për përkushtimin në vazhdimësi të Shqipërisë për axhendën e reformave. Në takimin e zhvilluar me zv. presidentin Timmermans, ministri Bushati theksoi se Reforma transformuese në Drejtësi është unike dhe po vihet në bashkëpunim të ngushtë me partnerët. Timmermans inkurajoi vijimin e zbatimit të Reformës në Drejtësi, si themeli për forcimin e shtetit të së drejtës dhe përparimin e procesit të integrimit. Ndërkohë, gjatë takimit me komisionerin Avramopoulos, ministri Bushati nënvizoi se rezultatet e prekshme të arritura në luftën kundër krimit të organizuar, veçanërisht në luftën kundër kultivimit dhe trafikimit të kanabisit, janë fryt i vendosmërisë për të forcuar shtetin ligjor. Gjithashtu, ai theksoi se vullneti politik dhe angazhimi i qeverisë për të forcuar sundimin e ligjit janë të palëkundur dhe të pakthyeshëm.