Ahmetaj: Rritje ekonomike 4.2%, 260 mijë vende të reja pune
Bregasi: Lehtësimi i procedurave dha ndikim pozitiv te biznesi
Ministri i Financave dhe Ekonomisë, Arben Ahmetaj, deklaroi dje se në katër vjet janë hapur 260 mijë vende të reja pune, ndërsa në zyrat e punës janë 36 mijë vende të lira pune.
Ministri Ahmetaj tha se papunësia në vend është ulur në 13,9 për qind për shkak të rritjes ekonomike, përmirësimit të klimës së biznesit dhe luftës kundër informalitetit. Shifrat e punësimit dhe ekonomisë ministri i Financave, Ahmetaj, i paraqiti dje gjatë konferencës së zhvilluar nga BiznesAlbania dhe Ilo për prezantimin e studimit, “Mjedis mundësues për sipërmarrje të qndrueshme në Shqipëri” dhe “5 Vështirësitë kryesore që bizneset hasin në Shqipëri”. ” Lajmi i mirë është se dinamika e tregut të punës u është përgjigjur zhvillimeve pozitive të ekonomisë shqiptare, si rritjes ekonomike, përmirësimit të klimës së biznesit dhe betejës kundër informalitetit. Është bërë e modës që në Shqipëri, edhe statistikat pozitive të debatohen, por shumëkush e kupton që në finale ekonomia është reflektim pozitiv dhe negativ i perceptimeve të zhvillimeve ekonomike individuale dhe familjare. Në 4 vitet e fundit, shifrat e punësimit kanë qenë tejet inkurajuese. Duke iu referuar listëpagesës së Drejtorisë së Tatimeve, në tetor të vitit 2013, numri i të punësuarve ishte 423 mijë. Në tetor të vitit 2017, janë mbi 680 mijë të punësuar në borderonë e tatimeve, pra janë 260 mijë vende pune të reja pune në 4 vite. Rritja është 61 për qind. Deri këtu kemi arritur për shkak të një modeli ekonomik dhe betejës kundër informalitetit. Papunësia është 13,9 për qind dhe zbritëm nga 17,2 për qind që ishte. Pra, për herë të parë, papunësia, në 27 vjet, zbret në nivel 1 shifror. Për 10- mujorin e vitit 2017 janë të raportuara nga zyrat e punës 36 mijë vende të lira pune, ku sipërmarrja kërkon profesionistë”, tha Ahmetaj. Ministri i Financave, Ahmetaj tha se vitin e ardhshëm rritja ekonomike parashikohet 4,2 për qind. “Sipas parashikimeve tona, vitin e ardhshëm ekonomia shqiptare do të rritet 4,2 për qind. Ritmi i rritjes ekonomike ka ardhur i qëndrueshëm vit pas viti. Politikat tona fiskale kanë nxitur rritjen ekonomike dhe konsolidimin. Synimi ynë është të shkojmë një hap më tej në zhvillim e qëndrueshëm të rritjes ekonomike dhe gjithëpërfshirëse, që garanton rritjen e punësimit dhe produktivitetit në punë”, u shpreh Ahmetaj.
BREGASI Presidenti i “BiznesAlbania”, Luan Bregasi, tha se lehtësimi i procedurave ka ndikuar pozitivisht në klimën e biznesit. “Biznesi është ndjerë mirë me qeverinë ‘ Rama’ në mandatin e parë dhe treguesit e mandatit të dytë duken që janë pozitivë. Paketa e përmirësimit të procedurave tatimore dhe doganore në fund të vitit 2016, ka krijuar një marrëdhënie relaksuese mes sipërmarrjes, administratës tatimore dhe doganore. Nga 46 propozime që bëri sipërmarrja private për të përmirësuar klimën e të bërit biznes në Shqipëri, pothuajse 43 nga këto propozime u bënë pjesë e procedurës tatimore”, tha Bregasi. Për studimin e prezantuar, presidenti i “BiznesAlbania” tha se evidenton edhe 5 probleme, të cilat do të ndihmojnë për të rritur më shumë eficiencën e administratës, për një klimë më të konkurrueshme në treg dhe për një përputhje më të mirë të kërkesave të tregut të brendshëm me shkollat e arsimit profesional. Ministri Arben Ahmetaj e vlerësoi studimin si një përpjekje shumë frytdhënëse për administratën, për përmirësuar qëndrimet dhe procedurat administrative e politikat.