Trafik droge në Itali, pranga nënkomisarit të Fierit
Grupi i strukturuar trafikoi 2.5 tonë drogë në Ankona
Një nënkomisar i Policisë së Fierit dyshohet se është organizator i një grupi të strukturuar kriminal, që trafikonte drogë nga Shqipëria drejt Italisë.
Bëhet fjalë për shtetasin Festim Lelaj, i cili është arrestuar ditën e djeshme me urdhër të Prokurorisë së Krimeve të Rënda, pasi dyshohet se është "koka" e grupit që trafikonte drogë me kamion drejt Italisë. Gjithashtu, bashkë me të janë arrestuar edhe dy persona të tjerë, si pjesëtarë të grupit. Konkretisht, shtetasit Arbi Mustafa dhe Skënder Siceqa. Këta persona dyshohen se janë pjesë e një grupi të strukturuar kriminal, që trafikonte drogë në Itali. Grupi u zbulua në janar të këtij viti, ku në Ankona të Italisë, u ndalua një kamion me 2.5 tonë kanabis, që ishte nisur nga Shqipëria përmes Portit të Durrësit. Për atë ngjarje u arrestua shoferi i kamionit, shtetasi Dhimo Koraj. Më pas, më 9 janar, u arrestua edhe organizatori i parë i grupit, i cili ndodhet në burg, shtetasi Demo Progonati. Bashkë me të u arrestuan edhe Euron Hoti dhe Malton Lleshi, që janë në hetim nga Prokuroria e Krimeve të Rënda për trafikun. Burimet nga Prokuroria e Krimeve të Rënda thonë për "Panorama" se, organizatorët e trafikut janë Progonati dhe nënkomisari Lelaj. Ata dyshohen se kanë trafikuar edhe sasi të tjera droge drejt Italisë, kryesisht me kamionë. "Një operacion i Prokurorisë për Krime të Rënda përfundoi me ndalimin e disa personave, përfshirë edhe një oficer të lartë policie, i cili konsiderohet në rolin e organizatorit, të dyshuar si përgjegjës për trafikimin e 2.5 tonëve lëndë narkotike kanabis nga porti i Durrësit në drejtim të Italisë, ngjarje e ndodhur në janar 2017. Prokuroria për Krimet e Rënda nisi hetimin, pasi autoritetet italiane në Ankona zbuluan një kamion me lëndën narkotike, i cili drejtohej nga shtetasi shqiptar Dhimo Koraj. Në bazë të informacionit fillestar, të përcjellë në Drejtorinë e Përgjithshme të Policisë nga homologët italianë, Prokuroria për Krimet e Rënda zhvilloi hetimin. Bazuar në veprimet procedurale, deri më tani është arritur të identifikohen dhe arrestohen apo ndalohen disa persona, të cilët dyshohen se janë pjesë e këtij grupi të struk- turuar kriminal. Fillimisht, janë arrestuar para pak kohësh shtetasit, Demo Progonati, Euron Hoti dhe Malton Lleshi, të cilët tashmë hetohen me masë e sigurimit arrest në burg. Gjatë hetimit është vendosur caktimi i masës sigurimit arrest në burg për shtetasin Aurel Lazaj, masë, e cila është ekzekutuar para pak ditësh. Ndërkohë, është nxjerrë urdhërndalimi për shtetasit Festim Lelaj, aktualisht nënkomisar në Komisariatin e Fierit, Skënder Siceqa dhe Arbi Mustafa, të cilat janë ekzekutuar nga Policia", shkruan njoftimi i Prokurorisë. Nga ana tjetër, Demo Progonati, i dyshuar si organizator, nuk e ka pranuar asnjëherë akuzën për trafik droge, si në Gjykatë, ashtu edhe në Prokurori.