Ultimatumi i mjekëve të Urgjencës: Ikim nga puna
Reagon Drejtoria: Vijon puna, mjekët janë në krye të detyrës
“Largohemi nga vendi i punës”. Me këtë mesazh të fortë dhe në mënyrë masive, mjekët e urgjencës së brendshme në Qendrën Spitalore Universitare “Nënë Tereza” i kanë bërë të qartë Drejtorisë së QSUT vendimin për largimin nga vendi i punës.
Me anë të një shkrese drejtuar edhe Presidentit Meta, Kryeministrit Rama, ministres së Shëndetësisë Manastirliu, ata kanë denoncuar kushtet e vështira, me të cilat përballen çdo ditë, mbingarkesën dhe mosrespektimin e urdhrave nga shërbimet e tjera, të cilat referojnë dhjetëra raste në ditë në urgjencë, duke shkaktuar kaos në pavijon. Sikundër e parashikon Kodi i Punës, ata kanë njoftuar 30 ditë përpara Drejtorinë e QSUT- së mbi vendimin e dorëheqjes. Tetë mjekët që kanë firmosur shkresën janë: Elton Çalliku, Etionema Braçaj, Petrit Vargu, Jonida Kito, Petrit Gjorgji, Besnik Koçia, Afrim Yzeiraj dhe Eqerem Hasani. Pas publikimit të lajmit në media, i menjëhershëm ishte edhe reagimi i Ministrisë së Shëndetësisë. Zv. ministrja Mira Rakacolli ishte pas mesdite në ambientet e urgjencës së QSUT- së, ku u takua me trupën e mjekëve për të dëgjuar nga afër shqetësimet që ata kanë. Zërat nëse vendimi për dorëheqje ishte një shkëndijë për të vënë në lëvizje strukturat më të larta apo një vendimmarrje e pakthyeshme, do të marrin përgjigje me kalimin e ditëve.
QSUT Vetë Drejtoria e QSUT- së, përmes një njoftimi për mediat, ka nxituar të sqarojë se të gjithë mjekët janë në punë dhe se në asnjë rast nuk është ndërprerë shërbimi ndaj pacientëve. “Në vazhdim të disa lajmeve të pavërteta që kanë qarkulluar në disa media ditën e sotme, Drejtoria e Qendrës Spitalore Universi- tare “Nënë Tereza” sqaron opinionin publik se puna në Urgjencën e Sëmundjeve të Brendshme nuk është ndërprerë për asnjë moment. Të gjithë mjekët që punojnë në këtë shërbim janë në punë dhe në asnjë rast nuk është ndërprerë shërbimi ndaj pacientëve”, thuhet në njoftim. Po ashtu, zyra e shtypit ka apeluar qytetarët që të drejtohen sa më pranë vendbanimit të tyre për të marrë shërbimin mjekësor, pasi vetëm kështu do të mund të reduktohen flukset e shtuara dhe mbingarkesat e panevojshme në QSUT.
ZAIMI Edhe për shefin e shërbimit të Urgjencës, Edmond Zaimi, puna në pavijon vijon normalisht. Ndonëse pranoi problematikat, me të cilat bluzat e bardha hasen çdo ditë për shkak të mbingarkesës, Zaimi tha se kjo është një çështje e brendshme, e cila duhet të marrë zgjidhje. “Situata është e ngarkuar me shumë të sëmurë jo vetëm të Tiranës, por nga gjithë Shqipëria. Në të tilla kushte, i gjithë stafi i Shërbimit të Urgjencës ka shkruar një tip peticioni për Drejtorinë e Urgjencës, por që akoma nuk është dorëzuar në Drejtori me kërkesat tona për të rregulluar gjendjen. Është një problem që ka ekzistuar, por që është thelluar së tepërmi këto ditët e fundit duke bërë të pamundur vazhdimësinë e punës nga ana jonë. Por janë probleme që do t’i zgjidhim përmes njëritjetrit me forca tona të brendshme”, u shpreh Zaimi.