Basha- Daul: Të hapen bisedimet për anëtarësim
“Kërcënimi dhe pengesa kryesore mbetet kriminalizimi i politikës”
Kryetari i Partisë Demokratike, Lulzim Basha, në takimin që pati dje në Bruksel me Presidentin e Partive Popullore Europiane, Joseph Daul, akuzoi qeverinë se po pengon integrimin e vendit përmes mbrojtjes që po i jep krimit dhe kapjes së drejtësisë.
“Pozita e vështirë, në të cilën qeveria e ka vënë Shqipërinë dhe integrimin e saj europian, ishte tema kryesore e takimit.
Kryetari i opozitës ndau me Presidentin e PPE, shqetësimin se mbrojtja politike, përmes imunitetit parlamentar, e ish- ministrit të Brendshëm Tahiri, i akuzuar për trafik ndërkombëtar droge, dështimi i Policisë për të arrestuar tre ish- drejtues të lartë të saj për të njëjtën dosje droge si dhe përpjekja për të emëruar një Prokuror te Përgjithshëm vetëm me votat e PS, janë veprime të qeverisë për të penguar drejtësinë dhe që minojnë shanset e vendit për integrim europian”, thuhet në njoftimin e shpërndarë për mediat nga zyra e shtypit e Partisë Demokratike. Kreu i PD- së kërkoi një qeveri antimafia dhe Reformë Zgjedhore, që do lejojë zgjedhje të lira dhe të ndershme. “Për të avancuar projektin europian të vendit, opozita ka parashtruar si zgjidhje politike krijimin e një qeverie antimafia, që do të shkëpusë lidhjet e krimit me politikën, do të përgatisë një Reformë të vërtetë Zgjedhore dhe do ta çojë vendin me sukses drejt një qeverie legjitime përmes zgjedhjeve të lira e të ndershme. Kryetari Basha e falënderoi Presidentin e PPE- së Joseph Daul, si një nga zërat e parë të Europës, që denoncoi kriminalizimin dhe fenomenin e kanabizimit të Shqipërisë. Presidenti Daul i garantoi Lulzim Bashës mbështetje të plotë të PPE- së për Partinë Demokratike si alternativë qeverisëse”, thuhet në njoftimin e PDsë. Sipas Bashës, BE duhet të nisë negociatat për anëtarësim me Shqipërinë.
“Kreu i PD tha se interesi më i mirë i shqiptarëve, është nisja e bisedimeve për anëtarësimin në Bashkimin Europian. Kërcënimi dhe pengesa kryesore mbetet kriminalizimi i politikës dhe ekonomisë së vendit. Me Presidentin Daul u bisedua edhe rreth shqetësimit të shumë vendeve anëtare të Bashkimit Europian në drejtim të hapave që vendi ynë duhet të ndërmarrë kundër krimit të organizuar dhe korrupsionit. Rezultatet në luftën kundër krimit, drogës dhe korrupsionit konsiderohen si kushte të patejkalueshme për integrimin europian të Shqipërisë”, thuhet në njoftimin e zyrës së Partisë Demokratike.