Bien akuzat, Ruçi merr vizë për në SHBA
Kreu i Kuvendit ftohet në Kongres, vizita më 7 dhjetor
Marrin fund dilemat dhe akuzat politike se Gramoz Ruçi, kryetari i Parlamentit, ishte shpallur “non grata” nga Shtetet e Bashkuara të Amerikës. Kryetari i Parlamentit do të zhvillojë një vizitë në SHBA më datë 7 dhjetor i ftuar nga kongresmeni Robert Pittinger, i cili mban postin e zëvendëskryetarit të Nënkomisionit për Terrorizmin dhe Financimin e Paligjshëm në Kongresin Amerikan. Me këtë ftesë shuhen përfundimisht zërat se kreu i Parlamentit nuk ka mbështetjen e Departamentit Amerikan të Shtetit. Në këtë takim Ruçi do të marrë pjesë në forumin e 10- të parlamentar për Inteligjencën dhe Sigurinë në Uashington. Gramoz Ruçi do të shoqërohet në këtë aktivitet të rëndësishëm në SHBA nga kryetari i Grupit Parlamentar të Partisë Socialiste, Taulant Balla, kryetarja e Komisionit të Jashtëm, ish- ministre e Mbrojtjes, Mimi Kodheli dhe nga deputeti Anastas Angjeli. “Me ftesë të kongresmenit Robert Pittinger, zëvendëskryetar i Nënkomisionit për Terrorizmin dhe Financimin e Paligjshëm në Kongresin Amerikan, kryetari i Kuvendit të Shqipërisë, z. Gramoz Ruçi, do të marrë pjesë në Forumin e 10- të Parlamentar për Inteligjencën dhe Sigurinë në Uashington D. C. në datën 7 dhjetor 2017. Gjatë kësaj vizite, kryetari i Kuvendit, z. Gramoz Ruçi, shoqërohet nga kryetari i Grupit Parlamentar të Partisë Socialiste, z. Taulant Balla, kryetarja e Komisionit për Politikën e Jashtme, znj. Mimi Kodheli dhe nga deputeti Anastas Angjeli”, thuhet në njoftimin e Parlamentit. Në këtë forum të 10të parlamentar për Sigurisë dhe Inteligjencën ka 119 pjesëmarrës, nga 45 vende, për të diskutuar mbi financimin e terrorizmit, sigurinë kibernetike dhe bashkëpunimin në fushën e inteligjencës. Gramoz Ruçit i është refuzuar viza për të udhëtuar në Amerikë në vitin 2005. Këtë fakt e ka konfirmuar dhe Kryeministri Edi Rama në një intervistë në “Top Story”. Rama ka thënë se Ruçit më të vërtetë iu mohua viza amerikane në vitin 2005, por dy muaj më vonë ky gabim u korrigjua. “Gramoz Ruçit i është refuzuar një vizë në vitin 2005 dhe më pak se dy muaj më pas i është dhënë viza për SHBA si i ftuar në kongresin e Partisë Republikane. Ajo ftesë në kongresin e republikanëve, që nuk kishte lidhje me Gramozin, ka qenë një shprehje e të vërtetës së thjeshtë se me atë refuzim u bë një gabim. Nuk ka rëndësi, sepse kryetari i Kuvendit do të vizitojë Kongresin Amerikan dhe kjo merr fund”, ka deklaruar Rama më datë 14 shtator, para se Ruçi të zgjidhej kryetar i Parlamentit.