Nuk i dhanë rrogën, tenton të vetëdigjet

Ish- punonjësi i një supermarketi në Tiranë ka tentuar të vetëdigjet mëngjesin e djeshëm, në shenjë proteste pasi nuk i kishin dhënë rrogën. Ngjarja ka ndodhur rreth orës 10: 45, në rrugën dytësore të autostradës Tiranë- Durrës, kur Policia është lajmëruar përmes një telefonate në Sallën Operative, për një person që po tentonte të vetëvritej. Në vendin e ngjarjes kanë shkuar menjëherë shërbimet e Komisariatit nr. 6, që kanë nisur negociatat me shtetasin me iniciale S. Zh., i cili kishte hipur në tarracën e një ndërtese dhe kërcënonte se do të digjte veten. Burimet thanë se ky person mbante në dorë një bidon plastik të mbushur me benzinë dhe gjatë negociatave ka pretenduar se nuk ishte paguar nga pronarja e marketit ku kishte punuar. Kjo ishte arsyeja që ai po protestonte në këtë mënyrë duke kërcënuar me vetëvrasje. Në këto rrethana, Policia ka lajmëruar edhe ishpunëdhënësen e shtetasit S. Zh., e cila ka shkuar në vendngjarje dhe ka biseduar edhe vete më të. Policia tha se menjëherë pas negociatave, së bashku me pronaren e marketit, shtetasi S. Zh., është bindur që të zbresë pa u lënduar. Mësohet se atij i është premtuar që do i jepeshin paratë që nuk kishte marrë dhe për këtë arsye ka pranuar të zbresë. "Në autostradën Tiranë- Durrës, në rrugën dytësore, në tarracën e një marketi, shtetasi S. Zh., ishpunonjës në ketë market, ka hipur dhe tenton të vetëdigjet pasi nuk është paguar. Menjëherë, kanë ndërhyrë shërbimet e Policisë së bashku me pronaren e biznesit, ku pas negociatave, shtetasi S. Zh është bindur dhe ka zbritur pa u lënduar", tha dje Policia.