Kryeprokurori, ambasadorët e SHBA- BE pro Ramës
Lu e Vlahutin: Mbështesim propozimin e OPDAT dhe EURALIUS
Ambasada e SHBA- ve mbështet opinionin ligjor që OPDAT- i dhe EURALIUS- i i kanë dhënë Parlamentit për zgjedhjen e kryeprokurorit të përkohshëm me shumicë të thjeshtë. Kur në Komisionin e Ligjeve maxhoranca dhe opozita debatonin për mënyrën se si zgjidhet prokurori i ri i përgjithshëm, ambasadori amerikan në Tiranë, Donald Lu, përmes një deklarate, i dha mbështetje propozimit të misioneve të huaja që u morën me Reformën në Drejtësi. “Kushtetuta dhe ligji për Prokurorinë janë të qarta. Ambasada e SHBA- ve mbështet opinionin ligjor që OPDAT- i dhe EURALIUS- i i kanë dhënë Parlamentit. Ne nxisim Parlamentin të zbatojë ligjin”, thuhet në reagimin e ambasadorit Lu për debatin e zgjedhjes së kryeprokurorit. Edhe nga delegacioni i Bashkimit Europian në Tiranë, reagimi ishte thuajse i sinkronizuar me atë të SHBA- ve. “Ligji për organizimin dhe funksionimin e prokurorisë parashikon dispozita të qarta tranzitore – siç konfirmohet nga EURALIUS- i dhe OPDAT- i në opinionin e tyre në Kuvend. Ne e ftojmë Kuvendin të procedojë në respekt të plotë të ligjit”, thuhet ne reagimin e Bashkimit Europian. Por, cilat ishin rekomandimet e misioneve të OPDAT- it dhe EURALIUS- it, dhënë rreth dy javë më parë? Sipas tyre, Prokurori i Përgjithshëm i Parakohshëm duhet të zgjidhet nga Parlamenti në bazë të ligjit për Prokurorinë e Përgjithshme. Dy misionet ndërkombëtare flasin qartë për kriteret që duhet të përmbushë personi, të cilit do t’i besohet përkohësisht organi i akuzës.
EURALIUS dhe OPDAT saktësojnë se në periudhën kalimtare, mandati i këtij Prokurori të Përgjithshëm do të jetë i përkohshëm dhe së fundmi, dy misionet kujdesen të theksojnë se ligji për regjimin kalimtar nuk përcakton në mënyrë të qartë kuorumin për zgjedhjen e tij, por thjesht parashikon një zgjedhje të përkohshme nëpërmjet një vendimmarrjeje të Kuvendit.
Ndërkohë, dispozitat kalimtare përcaktojnë të drejtën dhe detyrimin e Kuvendit për të zgjedhur një prokuror me shumicë të thjeshtë, në prani të më shumë se gjysmës së të gjithë anëtarëve të Kuvendit.