Ushtria në Fier, ndihma për banorët e përmbytur
Në Darëzezë shpërndahet bazë ushqimore për gjënë e gjallë
FIER - Në zonat e prekura nga përmbytja në Fier, vijon shpërndarja e ndihmave për banorët e dëmtuar. Ushqime, si miell, makarona, vaj, sheqer, etj., i janë shpërndarë çdo familjeje, ndonëse kryefamiljarët kanë apeluar të investohet në argjinatura dhe jo në ndihmat për vit pas çdo përmbytjeje që ndodh. Tashmë po shkon drejt fundit procesi i evidentimit të banesave e subjekteve të dëmtuara. Grupet e vlerësimit janë duke verifikuar dëmet e shkaktuara nga përmbytja e Vjosës në fshatrat Ferras, Pishë, Qarr, Martin, Boçovë, Bashkim, Kashisht dhe Hambar. Procesi i verifikimit ka vijuar normalisht pa pasur përplasje me banorët. Këta të fundit janë edhe vetë prezentë gjatë verifikimit të dëmeve, ku krahas atyre të evidentuara nga grupet e vlerësimit, ata vetëdeklarojnë dëme, të cilat mendojnë se nuk po u shënohen. Kjo bëhet për të evituar pakënaqësitë e viteve të mëparshme, ku mjaft banorë të dëmtuar nuk morën ndihmë, ndërsa të tjerë që nuk u prekën nga përmbytja u dëmshpërblyen. Bashkia e Fierit bëri të ditur dje se ndihmat po shpërndahen në të gjitha njësitë administrative. “Vazhdon shpërndarja e ndihmave në çdo njësi administrative, fshat dhe familje të prekura nga përmbytjet e ditëve të para të dhjetorit”, shpjegojnë burimet e Bashkisë.
Ndërkohë në Darëzezë ka nisur shpërndarja e bazës ushqimore për bagëtitë. “Ka filluar shpërndarja e bazës ushqimore për njësinë administrative Dërmënas, ku ushtria ka sjellë dhjetë kamionë për 3 fshatrat Pojan, Povelcë dhe Darëzezë, që i bie ushqim për rreth 6500 krerë të imta dhe 700 krerë lopë. Pas kësaj, qeveria ka akorduar edhe ndihma të tjera për ata banorë që janë nën ujë”, u shpreh kreu i njësisë, Dilaver Shytaj. Dëmet më të shumta në fshatrat e përmbytura janë shënuar në pajisjet, përfshirë këtu ato elektroshtëpiake, por edhe mobilie, dollapë, rroba etj. Gjithashtu, rryma u ka marrë dhjetëra shpendë, por janë shënuar edhe disa kafshë të ngordhura. m. r