Granatë e letër kërcënuese në oxhakun e shtëpisë

ELBASAN – Granatë dhe letër kërcënuese mbi oxhakun e shtëpisë, mister autori. Një 48- vjeçar nga fshati Liçaj në Cërrik ka bërë denoncim në Polici për kanosje, për shkak se në shtëpinë e tij të dytë ka gjetur një granatë dore defensive të montuar me ndezës dhe pranë saj një letër kërcënuese. Pas marrjes së denoncimit, forcat e Policisë së Cërrikut kanë shkuar në vendin e ngjarjes dhe kanë bërë sekuestrimin e granatës dhe letrës në cilësinë e provës materiale. Mësohet se 48- vjeçari B. L nuk banon në këtë shtëpi, pasi prej kohësh ai bashkë me familjen jeton në Elbasan. Gjatë dëshmisë së tij para oficerëve të Policisë, kryefamiljari është shprehur se nuk ka konflikte me persona të tjerë dhe për këtë arsye nuk ka asnjë dyshim se cili mund të jetë autori i këtij kërcënimi. Ndërkohë, Policia po punon për sqarimin e plotë të rrethanave të ngjarjes, identifikimin dhe kapjen e autorit.

Hetimi i çështjes i ka kaluar Drejtorisë Vendore të Policisë Elbasan dhe posaçërisht Sektorit për aktet terroriste dhe krimet e rënda dhe Prokurorisë së Rrethit Gjyqësor Elbasan për veprime të mëtejshme për veprën penale “Kanosje” dhe “Prodhimi dhe mbajtja pa leje e armëve luftarake dhe e municionit”. “Më datë 07.12.2017, shtetasi B. L., 48 vjeç, banues në fshatin Liçaj të Njësisë Administrative Shalës Cërrik, ka njoftuar Komisariatin e Policisë Cërrik se, kur ka shkuar në banesën në pronësi të tij, por që nuk banonte njeri, mbi pjesën e oxhakut ka gjetur një granatë dore defensive të montuar me ndezës dhe pranë saj një letër kërcënuese. Ky shtetas, së bashku me familjen e vet, banon në Elbasan. Nga ana jonë janë kryer veprimet e para procedurale dhe në cilësinë e provës materiale është sekuestruar letra dhe granata”, bëhet e ditur nga Policia. m. s