Dikur “Bravo çuna”, tani test droge e gjurmë gishtash
Porosia e Çakos për policët e emëruar pas vitit 2013
Të gjithë punonjësit e Policisë, që janë emëruar pas vitit 2013, ose janë kthyer rishtas në Policinë e Shtetit pasi ishin larguar më parë, janë të detyruar të japin gjurmët e gishtave dhe ADN.
Zyrtarisht nga Policia e Shtetit mësohet se kjo është një porosi e Drejtorit të Përgjithshëm të Policisë, Haki Çako, në zbatim të nenit 42 të Ligjit për Policinë. Por duket se kjo ka të bëjë më tepër me nisjen e vetingut në Polici si dhe pas dyshimeve për implikimin e punonjësve të Policisë në veprimtari të jashtëligjshme, kryesisht që kanë të bëjë me kultivimin e drogës. Tashmë efektivët që ish- ministri i Brendshëm, Saimir Tahiri, i përgëzonte herë pas here, "bravo çuna", do të kalojnë në "sitën" e pastërtisë së figurës, që, në fakt, parashikohet me ligj. Burime zyrtare të Policisë thanë dje se, nga vendimi i marrë së fundmi, përjashtohen efektivët që kanë qenë pjesë e Policisë së Shtetit para vitit 2013, për të cilët tashmë ekzistojnë në sistemin e të dhënave, gjurmët e gishtave dhe ADN. Nga ana tjetër mësohet se me porosi të Çakos, efektivët janë të detyruar të kryejnë edhe testin e drogës. Ndonëse, zyrtarisht thuhet se bëhet fjalë për një kontroll të përgjithshëm mjekësor, që parashikohet nga Rregullorja e Policisë dhe kryhet të paktën një herë në vit.
GJURMET E GISHTAVE
Dhënia e gjurmëve të gishtave nga punonjësit e Policisë është një procedurë formale ligjore për të provuar pastërtinë e tyre dhe kryhet për disa arsye. Për të vërtetuar nëse një polic është autor i ndonjë vrasjeje, plagosjeje, vjedhjeje apo ngjarjeje tjetër kriminale; nëse uniformat blu janë të implikuara në ngjarje të ndryshme kriminale; për të vërtetuar nëse një efektiv policie ka fshehur provat e një ngjarjeje; gjurmët e gishtave merren pasi janë mjeti më i pagabueshëm për të vërtetuar implikimin ose jo të një agjenti policie në vepra të ndryshme penale; për të vërtetuar nëse një efektiv policie ka qenë i implikuar në ngjarje të rënda kriminale edhe gjatë kohës kur nuk ka qenë në radhët e uniformave blu; nëse ai ka qenë në lirim dhe është kthyer përsëri në punë, për të vërtetuar nëse ka kryer diçka të jashtëligjshme gjatë kohës kur ka qenë pa punë.
VETINGU
Prej fillimit të muajit shtator, ministri i Brendshëm, Fatmir Xhafaj ka urdhëruar përgatitjen e ligjit për nisjen e vetingut në Policinë e Shtetit. Në zbatim të vetingut, parashikohet verifikimi i pasurisë së punonjësve të Policisë së Shtetit, të Gardës së Republikës dhe Shërbimit të Çështjeve të Brendshme dhe Ankesave. Verifikimi konsis- ton në llogaritë bankare, numrin e banesave, automjeteve apo bizneseve që ata mund të kenë. Gjithashtu, verifikimi i pastërtisë së figurës për të gjithë këta punonjës, duke verifikuar formularin e dekriminalizimit që ata vetë kanë plotësuar. Në rastet kur ka dyshime, do të ver- ifikohet nga grupi i punës nëse kanë qenë të dënuar, proceduar apo të hetuar më parë. Po kështu edhe aftësitë profesionale të çdo punonjësi. Verifikimi do të kryhet në bazë të dosjeve të Drejtorisë së Standardeve Profesionale, por do të verifikohet edhe ecuria në karrierë e tyre.