Sabri Laçi dekan i ri i Filologjikut, fituesi shpallet pas 36 orësh
Rezultati shpallet vetëm pas 36 orësh pritjeje, studentët bëjnë diferencën me 300 vota më shumë në favor të Laçit
Janë shoqëruar me jo pak tension, polemika, bllokim dhe vonesa zgjidhjet për dekan në Fakultetin e Histori- Filologjisë. Pas 36 orësh ngujim, Komisioni i zgjedhjeve ka mandatuar në postin e dekanit pedagogun, Sabri Laçi.
Kanë qenë votat e studentëve, ato të cilat kanë bërë diferencën, duke i dhënë fitoren Laçit përballë kandidates tjetër, pedagoges Aljula Jubani. Por më shumë sesa ky rezultat, që është certifikuar në orët e vona të pasdites së djeshme, ajo çfarë mori vëmendjen, ishte procesi i tejzgjatur dhe debatet që e shoqëruan, të cilat kulmuan ditën e djeshme.
ZGJEDHJET
Sikundër ishte paracaktuar, zgjedhjet për dekanin e ri në fakultetin e Histori- Filologjisë u mbajtën në 7 dhjetor. Problemet nisën gjatë procesit të numërimit të votave, i cili u ndërpre disa herë duke sjellë bllokim dhe tension në radhët e mbështetësve të dy kandidatëve në garë. Për 36 orë me radhë, anëtarët e komisionit, dhe jo vetëm, mbetën të ngujuar pa prodhuar një rezultat. Orët e gjata u shoqëruan me akuza të ndërsjella. Laçi dhe Jubani kontestuan procesin duke e konsideruar atë të parregullt dhe të manipuluar. “Në mënyrë arbitrare, pa u mbështetur në asnjë akt ligjor, një votues i ligjshëm është lënë jashtë listave. Terror ndaj studentëve”, tha Laçi. Në këtë situatë të paprecedentë, vetëm pasditen e djeshme, komisioni ka dalë me një qëndrim zyrtar duke shpallur fitues pedagogun Sabri Laçi. Kanë qenë votat e studentëve, të cilat, dje, ashtu si edhe 27 vite më parë, sollën ndryshimin. Për rastësi apo ironi, zgjedhjet për dekan përkuan me ditën e rinisë, por që për fat të keq, dëshmuan edhe një herë se sa larg jemi nga lëvizja e dhjetorit të viteve ‘ 90. Nga të dhënat, mësohet se nga 1200 studentë që kanë marrë pjesë në votim, 750 kanë votuar për Laçin ndërsa pjesa tjetër për Jubanin. E kundërta ka ndodhur me votat e mbledhura nga stafi pedagogjik, ku raporti ka qenë 41 me 39 në favor të kandidates Jubani. Në fund, komisioni ka shpallur rezultatin duke i dhënë fitoren Laçit me 50.2 për qind të votave.
REAGON JUBANI
Në një prononcim dhënë për gazetën, Jubani e ka cilësuar anormale situatën e krijuar, me parregullsi skandaloze dhe të turpshme. Ndërsa rendit parregullsitë e vërejtura, kandidatja për dekane pohon se raporti me të gjitha shkeljet është dorëzuar pranë Komisionit Institucional të Zgjedhjeve ( KIZ). Do të jetë ky komision që do të thotë fjalën e fundit. “Ajo që kam bërë gjatë gjithë këtij procesi ka qenë ndjekja, verifikimi dhe dokumentimi i çdo parregullsie të krijuar. Të gjitha këto janë përcjellë në Komisionin Institucional të Zgjedhjeve në UT. Pa përfunduar procedura ligjore, zyrtare nuk mund të kem asnjë qëndrim tjetër. Jemi vënë përballë një sjelljeje rruge të ardhur në auditoret e universitetit në mënyrë të turpshme, me presione ndaj studentëve me lista, me presione ndaj pedagogeve etj.”, u shpreh Jubani.