Mesazhi i Lu: Korrupsioni përfundon kur njerëzit vendosin se kanë duruar boll
"Korrupsioni përfundon kur njerëzit vendosin se kanë duruar boll"
Ambasadori amerikan në Tiranë, Donald Lu, ka lëshuar dje një mesazh shumë të fortë për shoqërinë shqiptare, e posaçërisht për rininë në ditën ndërkombëtare kundër korrupsionit. Me një shënim dhe foto të postuar në faqen zyrtare të Ambasadës së SHBA- ve në rrjetin social "Facebook", Donald Lu apelon ndaj të rinjve që të mos durojnë më fenomenin e korrupsionit dhe se kjo situatë përfundon vetëm kur njerëzit fillojnë dhe veprojnë. "Në një shoqëri, korrupsioni përfundon kur njerëzit e saj më në fund vendosin se kanë duruar boll dhe fillojnë të veprojnë. Shpesh kjo udhëhiqet nga të rinjtë", thuhet në mesazhin e ambasadorit Lu. Disa javë më parë, Donald Lu ka mbajtur një qëndrim po aq të fortë gjatë një aktiviteti me të rinjtë për luftën ndaj korrupsionit. "Në 27 vitet e fundit, ky vend është përballur me problemin tjetër, me problemin e turpshëm të politikanëve të fuqishëm, nga e djathta dhe nga e majta, që kanë kryer krime të tmerrshme dhe i kanë shpëtuar drejtësisë, pa pushim. Nuk do të ishte e përshtatshme për mua të them nëse Saimir Tahiri është fajtor apo i pafajshëm. Por, është jashtëzakonisht e rëndësishme që ju si drejtues të shoqërisë civile, ju si të rinj, ju si qytetarë të Shqipërisë të zbuloni të vërtetën. E drejta për të ditur të vërtetën nuk i përket asnjë partie politike. U përket qytetarëve të Shqipërisë. Askush nuk duhet të jetë mbi ligjin. Ju nuk jeni gjyqtarë apo prokurorë, por jeni njerëz që votoni. Ju i dhatë besimin tuaj këtij per- soni si anëtar i Kuvendit dhe si ministër i lartë i kabinetit. Është përgjegjësia juaj të kërkoni që publiku të dijë të vërtetën për këtë çështje. Nëse është i pafajshëm, njerëzit duhet ta dinë këtë. Nëse është fajtor, ai duhet të përballet me drejtësinë", ka thënë Lu.