Gjiknuri: Lehtësira në shërbimin e patentave për qytetarët

Ministri i Infrastrukturës dhe Energjisë, Damian Gjiknuri, inspektoi dje zyrat e Drejtorisë së Shërbimit të Transportit Rrugor në Shkodër. Pasi u njoh me mjediset e punës dhe sportelet e shërbimit për qytetarët, ministri u ndal te reforma e pritshme në këtë sektor problematik. “Jo më kot jemi këtu, te Drejtoria e Përgjithshme e Shërbimeve të Transportit në Shkodër, pasi duam të japim mesazhin që ky është një element shumë i rëndësishëm i qeverisë shqiptare në fushën e transportit, përtej përmirësimit të infrastrukturës dhe rritjes së sigurisë rrugore ku, siç e dini, u hoqën qindra e qindra tabela të vendosura në mënyrë të paligjshme në akset rrugore. Një element tjetër i rëndësishëm është sjellja e drejtuesve të automjeteve”, u shpreh Gjiknuri. Sipas tij, është shumë i rëndësishëm një filtër sa më i mirë për marrjen e patentave. Që ai që e merr këtë dokument, të ketë të gjitha njohuritë që përcakton ligji. “Reforma do të përqendrohet tek integriteti i këtij shërbimi, për të luftuar korrupsionin masiv, për të cilin fatkeqësisht ky institucion ka pasur reputacionin. Nga ana tjetër, krahas lehtësimit të shërbimeve përmes sistemeve online, do të përmirësohet puna për integritetin e proceSimit të çdo kërkese në këtë shërbim. E gjithë kjo strukturë do t’i nënshtrohet një reforme të thellë, e cila do të synojë elementët e sigurisë rrugore. Qeveria do të investojë nga ana materiale, pra, investimi nuk do të mungojë, por mbi të gjitha sjellja e drejtuesve të automjeteve varet shumë nga integriteti i shërbimit të kësaj drejtorie”, tha Gjiknuri.