Masivi shkëmbor bllokon autostradën Tiranë- Elbasan
Rikthimi i shirave në të gjithë Shqipërinë ka sjellë edhe dëme të tjera. Një masiv shkëmbor është rrëzuar në fshatin Mamël në rrethin e Elbasanit duke bërë që të bllokohet njëri krah i autostradës, që lidh kryeqytetin me të. Masivi shkëmbor mësohet se është rrëzuar rreth orës 06: 00 të mëngjesit duke thyer çdo barrierë anësore të autostradës së re. Lëvizja në këtë krah është e bllokuar, ndërsa ende nuk janë marrë masa për largimin e gurëve. Megjithatë, krahu tjetër i autostradës, ai që nis nga Tirana në drejtim të Elbasanit, është i lirë për automjetet. Vetëm krahu në drejtim nga Elbasani për në Tiranë mbetet i bllokuar nga masivi shkëmbor. Autoritetet po presin përmirësimin e motit për të ndërhyrë në mënyrë që të zhbllokojnë rrugën. Aktualisht, drejtuesit e mjeteve që vijnë nga Elbasani në drejtim të Tiranës, do të duhet të kalojnë nga rruga e vjetër e Kërrabës. Në momentin që masivi shkëmbor është rrëzuar, nuk ka pasur lëvizje automjetesh në këtë akt, ndaj nuk raportohen të lënduar, por vetëm dëme materiale. Ndërkohë, për gjatë gjithë autostradës nuk janë vërejtur problematika të tjera të kësaj natyre. Moti i keq i javës së kaluar ka shkaktuar shumë probleme në të gjithë vendin. Me qindra hektarë tokë janë përmbytur, kryesisht në jug të vendit, si dhe mbi 20 ura janë shkatërruar apo dëmtuar nga vërshimet e lumenjve. Më problematike situata është paraqitur në Fier dhe Vlorë, por përmbytje ka pasur edhe në Tiranë, Durrës dhe Lezhë. Fatmirësisht nuk janë shënuar viktima nga vërshimet e ujërave, ndërsa Emergjencat Civile vazhdojnë ende punën në terren në zonat e përmbytura.