Jerusalemi, protestat kundër vendimit të Trump me viktima
Izraeli në ofensivë ajrore, bombardon 4 lokacione të Hamas
Protestat e palestinezëve kundër vendimit të Presidentit amerikan, Donald Trump, për të njohur Jerusalemin si kryeqytet të Izraelit janë intensifikuar dhe kanë shënuar katër viktima.
Dy palestinezë u vranë të shtunën në sulmet ajrore izraelite në Gaza, sipas Ministrisë palestineze të Shëndetësisë, pasi tensionet u rritën. Forcat e Mbrojtjes të Izraelit thanë se avionët izraelitë kishte shënjestruar katër objekte që i përkasin Hamasit, grupi islamik palestinez që kontrollon Gazën. Ata kanë sulmuar në orët e para të së shtunës, në përgjigje të raketave të hedhura në Izraelin jugor nga Gaza. Ushtria izraelite tha se ka goditur dy vende të prodhimit të armëve, një depo armësh dhe një kompleks ushtarak. Të premten janë vrarë dy palestinezë të tjerë, pasi trupat izraelite qëlluan mbi turmat e protestuesve në Gaza. Grupi islamik Hamas u ka bërë thirrje palestinezëve që të nisin një kryengritje të re, si kundërpërgjigje ndaj vendimit të Presidentit Trump. Palestinezët dhe izraelitët e konsiderojnë Jerusalemin si kryeqytetin e tyre. Përleshjet sporadike shpërthyen të shtunën midis protestuesve palestinezë dhe forcave të sigurisë izraelite në një rrugë tregtare në pjesën lindore të Jerusalemit dhe në qytetet e Betlehemit dhe Ramallahut në Bregun Perëndimor. Forcat izraelite të sigurisë u përgjigjën me gaz lotsjellës, granata zhurmuese dhe plumba gome, ndërsa grupe të vogla protestuesish hodhën gurë. Shtatë vetë u arrestuan gjatë përleshjeve në Salah el- Din në Jerusalem, sipas zëdhënësit të Policisë izraelite, Micky Rosenfeld. Gjysmëhëna e Kuqe palestineze njoftoi se janë 12 të plagosur, pasi policia shpërndau demonstruesit atje. Ndërkohë, turma vajtuesish u mblodhën në Gaza për funeralet e katër njerëzve të vrarë atje.
Më shumë se 300 vetë u plagosën në Bregun Perëndimor, Gaza dhe Jerusalem të premten, 50 prej të cilëve kishin nevojë për trajtim spitalor, tha Ministria e Shëndetësisë e Autoritetit Palestinez. Të paktën 49 persona u plagosën të enjten gjatë protestave mbi vendimin e Trump, sipas Gjysmëhënës së Kuqe palestineze. Vendimi i Trump të mërkurën, për të njohur Jerusalemin si kryeqytetin e Izraelit dhe të lëvizë Ambasadën Amerikane në qytetin e shenjtë, është dënuar në rang ndërkombëtar dhe ka nxitur protesta në vende të ndryshme rreth globit, nga Indonezia në Malajzi, Irak, Jordani, Turqi dhe Egjipt. Ambasadorja e SHBA- ve në Kombet e Bashkuara, Nikki Haley, e mbrojti vendimin e Trump dhe kritikoi vendet anëtare për trajtimin ndaj Izraelit gjatë një takimi të jashtëzakonshëm të Këshillit të Sigurimit të OKBsë, të premten. Ajo tha gjith- ashtu se SHBA ka besueshmëri si me izraelitët, ashtu edhe me palestinezët dhe se çdo marrëveshje paqeje do të mund të nënshkruhet në lëndinën e Shtëpisë së Bardhë. “Shtetet e Bashkuara nuk paracaktojnë çështjet e statusit përfundimtar. Ne mbështesim një zgjidhje me dy shtete, nëse palët do të pranojnë”, tha ajo.