GJOBAT QE FSHIHEN Amnistia, 20 ditë afat për makinat dhe pensionet
Kategoritë që përfitojnë nga 20- ditëshi i fundit i amnistisë. Gjobat për taksat e biznesit, sigurimet dhe makinat që do të falen. Dokumentet që duhen
Deri më 31 dhjetor është afati i amnistisë për të përfituar faljen e gjobave dhe kamatëvonesave.
Qytetarët dhe biznesi kanë edhe 20 ditë afat për të shlyer detyrimet e prapambetura të periudhës 2011- 2014 për të përfituar faljen e gjobave për makinat, pensionet dhe kamatëvonesat e biznesit. Kusht i përfitimit të faljes është shlyerja e plotë e detyrimeve brenda 20 ditëve. PENSIONET E MAKINAT
Për faljen e gjobave dhe kamatëvonesave për sigurimet shoqërore dhe shëndetësore, për periudhën 1 janar 2011 deri në dhjetor 2014, qytetarët dhe biznesi kanë afat deri më 31 dhjetor 2017 për të paguar detyrimin e plotë. Në rast se detyrimi i prapambetur paguhet brenda 20 ditëve, debitorit do t’i falen gjobat dhe kamatëvonesat e sigurimeve shoqërore për pensionin. Po ashtu, nëse subjekti nuk ka kontribut për të paguar për periudhën 2011 deri në 2014, pasi ose e ka paguar më parë ose tatimi është zero, atëherë atij i aplikohet fshirja e gjobave dhe kamatëvonesave. Edhe pronarët e makinave që nuk kanë paguar taksat dhe kërkojnë ta mbajnë mjetin në qarkullim, duhet të paraqiten pranë drejtorive rajonale të Shërbimit të Transportit Rrugor brenda 31 dhjetorit, me qëllim shlyerjen e detyrimeve për periudhën 20112014. Në këtë rast, pronari i makinës përfiton falje të gjobave të llogaritura për efekt të mospagimit të taksave për periudhën janar 2011- dhjetor 2014 me kushtin që të paguajë brenda 31 dhjetor 2017 të gjitha taksat për periudhën janar 2011 deri në taksën e vitit 2017. Drejtoria e Përgjithshme e Shërbimeve të Transportit Rrugor ka publikuar dhe azhurnuar listën e makinave debitore, ku të gjithë personat e interesuar mund të bëjnë verifikimin e targës dhe karakteristikave të tjera të mjetit në këtë listë. Nëse brenda datës 31 dhjetor personat e interesuar nuk paraqiten për të mbajtur makinë në qarkullim, Drejtoria e Transportit Rrugor do të kryejë pa pagesë heqjen nga qarkullimi të mjetit dhe do të fshijë të gjitha detyrimet e papaguara. Më tej, lista e mjeteve me targat e çregjistruara i dërgohet Ministrisë së Brendshme dhe Policisë së Shtetit për sekuestrimin e tyre në rast se konstatohen në qarkullim. Edhe për biznesin që ka detyrime të papaguara në tatime dhe dogana, ka 20 ditë afat të shlyejë taksat për periudhën 2011- 2014 në mënyrë që të përfitojë falje të gjobave dhe kamatëvonesave. Për biznesin debitor në dogana, janë ngritur në degët rajonale komisionet, të cilat kanë shqyrtuar vendimet administrative dhe më pas kanë specifikuar shumën që falet dhe taksat që do të paguhen për të përfituar falje gjobash dhe kamatash.