Dekani fitues i Filologjikut letër Nikollës: Rezultati po manipulohet
Kryetarja e Komisionit të Institucionit të Zgjedhjeve në Universitetin e Tiranës, Majlinda Keta, e ka konsideruar të nxituar letrën që Laçi i ka drejtuar ministres Nikolla. Në një prononcim dhënë për gazetën, Keta hedh poshtë akuzat për manipulim të rezultatit të zgjedhjeve dhe tjetërsim të formulës për llogaritjen e votave të studentëve. “Zoti Laçi është nxituar për arsye se rregullorja e përcakton qartë që KIZ, vetëm pas 48 orësh, mund të shprehet për fituesin. Ne, sot, ( dje) kemi rihapur kutitë për rinumërimin e votave dhe nuk ka asnjë lëvizje nga numrat që ka pretenduar komisioni i zgjedhjeve në fakultetin e Histori- Filologjisë. Problematika qëndron në faktin që për herë të parë, kemi një rezultat shumë të ngushtë, përkatësisht 50.14 me 49.86. Formula do të respektohet ashtu siç është. KIZ nuk ka bërë kalkulim të formulës”. Komisioni Institucional i Zgjedhjeve pritet të dalë sot me një vendim. Për postin e dekanit të fakultetit të Histori- Filologjisë, në garë ishin dy pedagogët, Sabri Laçi dhe Aljula Jubani. Kryetarja e KIZ, Majlinda Keta pohon se në adresë të komisionit, përgjatë këtij harku ko- hor, janë depozituar vetëm tri shkresa, dy nga Jubani dhe një nga vëzhguesit dhe nuk ka pasur asnjë shkresë nga kandidati i shpallur fitues në fazën e parë, Laçi. “Deri sot ( dje), në orën 16: 00, KIZ ka pasur të drejtë të respektonte 48 orët pas shpalljes së rezultatit paraprak. Brenda këtij afati, pranë KIZ, ekzistojnë dy shkresa nga kandidatja Ajula Jubani, e cila në të parën deklaron mbi disa shkelje të procesit të numërimit dhe në të dytën, fokusi është vendosur te rezultati pas përfundimit të numërimit. Është depozituar po ashtu edhe një shkresë e tretë, nga disa vëzhgues dhe anëtarë të qendrave të votimit të studentëve, të cilët konstatojnë se në këto qendra ka pasur intimidime të studentëve për hedhjen e votës”, theksoi më tej Keta.