PD: Rama kontrollon të dhënat si "Big Brother"
"Hyn në regjistrin e Pronave, Tatimeve dhe Gjykatave"
Partia Demokratike ka akuzuar qeverinë se përmes vendimit për të vendosur të gjitha sistemet elektronike nën administrimin e Agjencisë Kombëtare të Shoqërisë së Informacionit, ka marrë nën kontroll të gjitha sistemet elektronike të shqiptarëve. Në një deklaratë për mediat, deputeti i PD- së, Endri Hasa, ka deklaruar se ky vendim do t'i hapë rrugë koncesionit të menaxhimit të TVSH, prapa të cilit fshihet vëllai i kryeministrit, Olsi Rama. "Me një vendim të qeverisë pak kohë më parë, Edi Rama ka vendosur nën kontroll të gjitha të dhënat e shqiptarëve dhe mund të veprojë pa lënë gjurmë në çdo sistem elektronik të vendit, përfshirë sistemet sekrete apo ato të sigurisë. Këtë e ka bërë duke vendosur të gjitha sistemet elektronike që financohen nga buxheti i shtetit nën administrimin e Agjencisë Kombëtare të Shoqërisë së Informacionit. Më parë kjo agjenci vepronte si koordinuese dhe mbikëqyrëse e veprimeve në sistemet elektronike ndërmjet institucioneve qeveritare, ndërsa me vendimin e Këshillit të Ministrave, AKSHI do të jetë njësoj si ' Big Brother'! ' Big Brother' i Edi Ramës mund të ndërhyjë pa i dhënë llogari askujt në regjistrin elektronik të Pronave, të Tatimeve, në Dogana, në Gjendjen Civile, në regjistrin e Gjykatave, në sistemet sekrete të sigurisë dhe në ato Mbrojtjes. Marrja nën kontroll e të dhënave nga ' Big Brother' i hap rrugë Edi Ramës të nisë koncesionin multimilioner të sistemeve elektronike, përfshirë atë të menaxhimit të tatimit mbi vlerën e shtuar, pas të cilit ka denoncime se është Olsi Rama", deklaroi Hasa. Deputeti i PD- së kujtoi se ky koncesion i kushtoi karrigen ministrit Shkëlqim Canit dy vite më parë, ndërkohë që me këtë koncesion kërkon të pasurojë familjen e tij. "Refuzimi i këtij koncesioni i kushtoi Shkëlqim Canit postin e ministrit të Financave dy vjet më parë. Nuk është çudi që, pas monopolizimit të sistemeve elektronike për llogari të pushtetit dhe pasurimit të kryeministrit e familjes së tij, ' Big Brother' të vendosë kontrollin edhe mbi internetin, dritaren e fundit të lirisë së fjalës", tha Hasa.