Ruçi: Vetingu, garanci për drejtësi të pavarur
“Heqja e tatimit të dyfishtë do nxisë investimet amerikane”
Kryetari i Kuvendit, Gramoz Ruçi, e sheh procesin e vetingut si garanci për të ndërtuar një drejtësi të pavarur.
Gjatë qëndrimit në Uashington, kryeparlamentari Ruçi u takua me kongresmenët Ron Estes, Elliot Engel dhe Robert Aderholt, si dhe me senatorin e Miçiganit, Gary Peters, kryetar i grupit të miqësisë me Shqipërinë në senat. Gjatë takimeve në Uashington, thuhet në njoftimin e Kuvendit, Ruçi i informoi kongresmenët dhe senatorin për ecurinë e deritanishme të implementimit të Reformës në Drejtësi dhe të procesit të vetingut si një garanci për ndërtimin e një sistemi drejtësie të pandikuar nga politika dhe të fortë në luftën kundër korrupsionit. Duke u ndalur në zhvillimet në rajonin e Ballkanit, kreu i Kuvendit falënderoi Kongresin Amerikan për vëmendjen ndaj rajonit dhe kërkoi prezencë më të lartë të kompanive amerikane në Shqipëri. Kryetari i Kuvendit mori pjesë në Forumin Parlamentar për Inteligjencën dhe Sigurinë. Ai shoqërohej në këtë forum nga kryetari i Grupit Parlamentar Socialist, Taulant Balla, kryetarja e Komisionit për Politikën e Jashtme, Mimi Kodheli, deputeti Anastas Angjeli dhe Fatmir Mediu, si përfaqësues i opozitës në delegacion. “Rëndësia e diskutimeve tona është e dominuar nga sulmet terroriste që kanë pasur në shënjestër qytetarë të pafajshëm në mbarë botën. Shpresa jonë është që ky forum do të ndihmojë që të theksojmë rëndësinë e një përpjekjeje gjithëpërfshirëse për të luftuar burimin e terrorizmit. Ndërkohë që ne bashkëpunojmë në forcimin e financimit të terrorizmit, sigurisë kibernetike dhe inteligjencës, ne do të mbrojmë interesat e përbashkëta kombëtare dhe qytetarët tanë. Jemi të hapur për zgjerimin e dialogut dhe bashkëpunimin tonë. Përmes përpjekjeve tona të përbashkëta, ne mund të vazhdojmë të parandalojmë sulmet e mundshme terroriste dhe të mposhtim misionin e tyre”, tha në fjalën e tij kongresmeni Pittenger. Gjatë viteve të fundit, Forumet Parlamentare të Sigurisë dhe In- teligjencës kanë tërhequr 700 deputetë dhe zyrtarë qeverie nga mbi 60 vende, për të diskutuar mbi financimin e terrorizmit, sigurinë kibernetike dhe bashkëpunimin në fushën e inteligjencës. Forumi i 10të Parlamentar për Sigurinë dhe Inteligjencën shënoi një pjesëmarrje të nivelit të lartë.