Transparenca financiare, PS e NDI memorandum bashkëpunimi mes tyre

Instituti Demokratik Amerikan është i gatshëm të mbështesë dhe të asistojë Komisionin e Reformës Zgjedhore si dhe Akademinë Politike të Partisë Socialiste në krijimin dhe mbështetjen e udhëheqësve të rinj politikë. Në një njoftim për shtyp, Partia Socialiste bëri të ditur të dielën se, në përmbyllje të vizitës zyrtare në SHBA, Sekretari i Përgjithshëm i Partisë Socialiste, Taulant Balla, zhvilloi një takim edhe me përfaqësuesit më të lartë të Institutit Demokratik Amerikan. Balla u shpreh se konkretizimi i këtij memorandumi bashkëpunimi është tepër i vyer për zhvillimin e transparencës së financimit të partive politike në vend, duke qenë se kjo e fundit është një prej çështjeve më të rëndësishme që po diskutohet sot në politikën shqiptare. “Për ne është shumë e rëndësishme asistenca e vyer që ky institut, siç njihet ndryshe NDI, do të japë për transparencën e financimit të partive politike. Kujtoj që, aktualisht, një prej çështjeve më të rëndësishme e që po diskutohet edhe në politikën shqiptare, është pikërisht transparenca, mënyra si financohen partitë politike në Shqipëri. Kemi një parti politike në Shqipëri, mbi të cilën rëndojnë akuza mbi mënyrën e financimit të një veprimtarie lobingu edhe këtu në SHBA”, u shpreh Balla. Sekretari i Përgjithshëm i PS tha se një fakt tjetër i rëndësishëm është se, NDI është i gatshëm të mbështesë dhe të asistojë Komisionin e Reformës Zgjedhore. “Do doja të theksoja që NDI është i gatshëm të mbështesë dhe të asistojë Komisionin e Reformës Zgjedhore, përsa i përket reformës së domosdoshme që duhet të konkretizojmë sa më shpejt, edhe përsa i përket çështjes së zgjedhjeve. Kuvendi i Shqipërisë ka ngritur një komision, i cili duhet të konkretizojë punën e tij sa më shpejt”, deklaroi deputeti socialist.